Ministru Prezidénsia Konsellu Ministrus, Agio Pereira, partisipa iha almosu traballu ho partisipante joven sira husi programa “Futuru Lider ba ASEAN”, ne’ebé lidera husi Vice-Ministra ba Asuntus ASEAN, Milena Maria da Costa Rangel. Eventu ne’e hala’o iha loron 25 fulan-jullu tinan 2024, iha Hotel Timor, Dili. Foku prinsipál husi sesaun ne’e mak importánsia lideransa no papél foin-sa’e sira-nian iha futuru Timor-Leste no ASEAN. 
Durante enkontru ne’e, Agio Pereira ko’alia aspetu esensiál oioin kona-ba lideransa. Ministru define lideransa hanesan abilidade atu inspira no orienta ema seluk, hodi promove kolaborasaun no kreximentu. Nia fó énfaze, lider ida ne’ebé loos tenke sai hanesan fonte inspirasaun no apoiu, la’ós ema ne’ebé foti de’it desizaun. Agio Pereira destaka importánsia étika no integridade iha lideransa, hodi afirma katak lider ida nia lejitimidade harii bazeia ba konfiansa no respeitu.
Governante ne’e subliña presiza lider joven sira-nia envolvimentu hodi dezenvolve solusaun inovativu ba dezafiu rejionál ASEAN nian. Nia enkoraja partisipante sira atu aplika prinsípiu lideransa hanesan adaptabilidade, empatia, integridade no vizaun iha sira-nia asaun loroloron. 
Agio Pereira sita figura sira hanesan Xanana Gusmão, ne’ebé salienta ninia reziliénsia no kompromisu iha nia lideransa no iha luta ba independénsia Timor-Leste nian, no Lee Kuan Yew, ne’ebé transforma Singapura liuhosi polítika pragmátika sira no vizaun estratéjika ida. Ministru hakotu hodi motiva joven sira atu uza konseitu lideransa hodi lori mudansa pozitivu ba sira-nia komunidade, prepara sira-nia an atu kontribui ho ativu iha senáriu rejionál ASEAN nian.
Programa “Futuru Lider ba ASEAN” hanesan inisiativa ida hosi Governu Timor-Leste, ne’ebé lansa iha fulan-abríl tinan 2024, ho objetivu atu prepara lider joven timoroan sira hodi hala’o knaar importante iha dezenvolvimentu nasionál no integrasaun rejionál iha ámbitu ASEAN nian. Programa ida-ne’e ho objetivu atu dezenvolve partisipante sira-nia kapasidade lideransa no hasa’e koñesimentu kona-ba ASEAN, promove komprensaun no kontribuisaun ne’ebé boot liután ba ajenda dezenvolvimentu Timor-Leste nian.