Husi loron 21 to’o 27 fulan-jullu tinan 2024, Timor-Leste sei marka prezensa iha Sorumutu Ministrus Negósius Estranjeirus ASEAN (AMM, sigla iha lian inglés) ba da-57 no iha sorumutu relevantes, ne’ebé sei hala’o iha Vientiane, Repúblika Demokrátika Populár Laos. 

Delegasaun timoroan ne’e sei lidera husi Ministru Negósius Estranjeirus no Kooperasaun, Bendito dos Santos Freitas, akompaña husi Vise-Ministra ba Asuntus ASEAN no Lider SOM (Senior Officials’ Meeting) Timor-Leste, Milena Rangel. 

Aleinde AMM ba da-57, partisipasaun Timor-Leste ne’e sei inklui, sorumutu paralelu oinoin hanesan Sorumutu Komisaun Zona Livre husi Armas Nukleares Sudeste Aziátiku (SEANWFZ, sigla iha lian inglés), Sorumutu Ministrus Negósius Estranjeirus ASEAN, Plataforma (Interface) ho Reprezentantes husi Komisaun Intergovernamentál kona-ba Direitus Umanus ASEAN (AICHR, sigla iha lian inglés), Konferénsias Pós-Ministeriais ASEAN (PMC, sigla iha lian inglés), Sorumutu Ministrus Negósius Estranjeirus ASEAN Plus ba da-25 (25.ª APT FMM, sigla iha lian inglés), Sorumutu Ministrus Negósius Estranjeirus iha Simeira Ázia Orientál ba da-14 (14.ª EAS FMM, sigla iha lian inglés) no Forum Rejionál ASEAN ba da-31 (31.º ARF, sigla iha lian inglés). 

Iha ámbitu programa ofisiál, Ministrus Negósius Estranjeirus ASEAN no Timor-Leste nian sei hala’o mós vizita kortezia ida ba Sonexay Siphandone, Primeiru-Ministru Repúblika Demokrátika Populár Laos.

Durante sorumutu hirak-ne’e, Ministru Bendito Freitas sei aproveita hodi partilla avansus iha implementasaun Roteiru Adezaun Plena Timor-Leste nian ba ASEAN, nune’e mós atu troka opiniaun kona-ba kestaun rejionál no internasionál sira.

Iha sorumutu ofisiál sira ne’e, Ministru Bendito Freitas sei iha mós sorumutu bilaterál ho parseiru esternu oinoin ASEAN nian, ho objetivu atu diskute prosesu adezaun Timor-Leste ba ASEAN no esplora áreas kooperasaun iha futuru hodi hametin lasus bilaterais.