Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 24 fulan-jullu tinan 2024

Konsellu Ministrus hala’o sorumutu iha Palásiu Governu,  Dili, no delibera hodi fó podér tomak ba Ministru Agrikultura, Pekuária, Peskas no Floresta, Marcos da Cruz, atu asina Memorandu Entendimentu entre Ministériu Agrikultura, Pekuária, Peska no Florestas, Repúblika Demokrátika Timor-Leste no Ministériu Agrikultura no Asuntus Rurais Repúblika Populár Xina kona-ba Konsolidasaun Kooperasaun Agríkola.

Memorandu Entendimentu ida-ne’e ho objetivu atu hametin kooperasaun agríkola ho forma pragmátika, hadi’a seguransa ai-han, promove dezenvolvimentu ekonómiku no sosiál no hasa’e moris-di’ak populasaun nasaun rua ne’e nian.

*****

Konsellu Ministrus delibera mós atu fó podér tomak ba Sekretáriu Estadu Komunikasaun Sosiál, Expedito Dias Ximenes, hodi asina memorandu entendimentu ida entre Repúblika Demokrátika Timor-Leste no Administrasaun Rádiu no Televizaun Nasionál Repúblika Populár Xina, ba kooperasaun iha ámbitu rádiu no televizaun.

*****

Ministru Komérsiu no Indústria, Filipus Nino Pereira, halo aprezentasaun ida iha Konsellu Ministrus kona-ba inisiativa reativasaun no revizaun liña Kréditu “Fasilidade Garantia Kréditu Suave”, hodi propoin ninia transformasaun ba iha programa foun ida ho títulu “Fasilidade Garantia Kréditu Saudavel”.

Halo revizaun ba programa ida-ne’e ho objetivu atu korrije kontradisaun sira ne’ebé observa ona, hadi’a liután efisiénsia no asesibilidade kréditu, no habelar/loke-tan atividade foun sira ekonomia nian. Mudansa sira inklui hadi’a modelu implementasaun no hadi’a rekizitus hodi hetan asesu.

Inisiativa ne’e ho objetivu atu promove no estimula investimentu privadu iha setor estratéjiku sira hanesan agrikultura, pekuária, peskas, turizmu no indústria, ne’ebé esensiál ba kreximentu no diversifikasaun ekonomia nasionál.

*****

Konsellu Ministru aprova mós projetu Rezolusaun Governu ne’ebé aprezenta hosi Ministra Finansas, Santina José Rodrigues F. Viegas Cardoso, kona-ba definisaun kompozisaun Komité Revizaun Polítiku ba Orsamentu Jerál Estadu ba tinan 2025.

Komité Revizaun Polítiku iha responsabilidade atu verifika alokasaun rekursus estratéjiku iha submisaun orsamentál, ho objetivu atu alkansa kompromisu no objetivu sira ne’ebé hatuur iha dokumentu estratéjiku sira no avalia viabilidade planu ba tinan finanseiru 2025.

Komité Revizaun Polítiku ne’e sei prezide hosi Primeiru-Ministru no kompostu mós hosi Vise-Primeiru-Ministru na’in-rua, Ministra Finansas, Ministru Obras Públikas no Ministru Planeamentu no Investimentu Estratéjiku. Sekretáriu Estadu Igualdade no Inkluzaun, Prezidente Institutu ba Defeza Direitus Labarik no reprezentante ida hosi Asosiasaun Defisiente Timor-Leste sei partisipa mós iha reuniaun Komité Revizaun Polítiku ne’e nu’udar observadór.

Reuniaun Komité Revizaun Polítiku ne’e sei hala’o hosi loron 12 to’o 27 fulan-agostu tinan 2024, iha Auditóriu Ministériu Finansas. REMATA