Ministériu Finansas, iha Tersa-feira, loron 23 fulan-jullu tinan 2024, ofisialmente fahe Sirkulár ho Regra Elaborasaun Orsamentu no Envelope Fiskál ne’ebé aprova ona ba kada Instituisaun Estadu ne’ebé halo parte iha perímetru orsamentál ba Orsamentu Jerál Estadu (OJE ) 2025 nian. Eventu ne’e hala’o iha Auditóriu Kay Rala Xanana Gusmão, iha Ministériu Finansas, Dili.

Serimónia ne’e sura ho partisipasaun husi Ministra Finansas, Santina José Rodrigues F. Viegas Cardoso, Vise-Ministra Finansas, Felícia Claudinanda Cruz Carvalho, Diretór-Jerál Planeamentu no Orsamentu, José Alexandre de Carvalho, Diretór Nasionál Orsamentu, Salomão Yaquim, no dirijente oioin husi administrasaun públika iha área finansas nian. 

Sesaun traballu ida-ne’e fó kontinuidade ba Jornada Orsamentál ba OJE tinan 2025 no Deliberasaun Konsellu Ministrus loron 17 fulan-jullu tinan 2024, ne’ebé define valór totál despeza ba kada títulu orsamentu OJE tinan 2025 nian, ho valór globál ne’ebé prevee dolar amerikanu biliaun 1,8.

Durante eventu ne’e, Ministra Finansas halo diskursu abertura no entrega simbóliku Sirkulár OJE tinan 2025 nian. Molok fahe ba liña ministeriál sira, iha aprezentasaun detallada ida kona-ba konteúdu sirkulár no simulasaun iha Sistema Informasaun Eletrónika Planeamentu, Monitorizasaun no Avaliasaun “Dalan ba Futuru” ba OJE tinan 2025. 

Liña ministeriál sira agora sei iha loron 11 (inklui feriadu no fin-de-semana) hodi elabora sira-nia proposta orsamentál. Proposta sira-ne’e sei analiza husi Komité Revizaun Orsamentál hosi loron 12 to’o 27 fulan-agostu tinan 2024. Prevee katak Proposta Lei OJE tinan 2025 sei entrega ba Parlamentu Nasionál to’o loron 1 fulan-outubru tinan 2024.