Ministériu Edukasaun, iha loron 18 fulan-Jullu tinan 2024, asina akordu kooperasaun bilaterál ho Governu Brazíl iha ámbitu Projetu Pilotu Formasaun ba Profesór sira  Ensinu Sekundáriu Tékniku-Vokasionál nian iha Timor-Leste. Serimónia asinatura ne’e hala’o iha salaun konferénsia Ministériu Edukasaun, Dili. 

Akordu Kooperasaun Bilaterál ne’e asina hosi Ministra Edukasaun, Dulce de Jesus Soares no hosi Enkarregada Asuntu Embaixada Brazil nian iha Dili, Rita de Cássia Lott Marques, ho prezensa husi Sekretária Estadu Ensinu Sekundáriu Jerál no Tékniku -Ensinu Sekundária Vokasionál , Domingos Lopes Lemos.

Iha ninia diskursu, Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál destaka katak edukasaun hanesan setór esensiál ida iha Programa IX Governu nian hodi alkansa edukasaun transformadora ida ba sosiedade no konkretiza vizaun dezenvolvimentu Timor-Leste nian.

“Kolaborasaun entre Timor-Leste ho Brazil iha área edukasaun antes ne’e produz ona rezultadu di’ak sira liuhosi programa oioin. Ami motivadu tebes ho perspetiva atu lori parseria ne’e ba nível susesu ne’ebé aas liu”, Sekretáriu Estadu Domingos Lopes Lemos ne’e akresenta. 

Enkarregada Negósiu Embaixada Brazil nian iha Dili, Rita de Cássia Lott Marques, hato’o nia fiar “katak projetu-pilotu ida-ne’e sei hetan susesu no ami hein katak susesu projetu ida-ne’e nian kontinua iha dalan ne’ebé luan liu iha tinan oinmai, no profesór sira husi Brazil, hamutuk ho kolega timoroan sira bele kontribui hodi hasa’e formasaun profisionál iha Timor-Leste”.