Sorumutu estraodináriu Konsellu Ministrus loron 16 fulan Setembru 2010
GOVERNU KONSTITUSIONAL BA DA-IV
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu estraodináriu Konsellu Ministrus, loron 16 fulan Setembru tinan 2010
Konsellu Ministrus hala’o sorumutu estraordináriu iha Kinta-feira ne’e, loron 16 fulan Setembru tinan 2010, iha ninia Sala Sorumutu, iha Palásiu Governu, iha Díli, no analiza ona:
1. Aprezentasaun kona-ba Transformasaun hosi Institutu Mikro-finansas ba Banku Komersiál
Ho objetivu atu avalia vantajen no desvantajen hirak kona-ba atu dezenvolve Intitutu Mikro-Finansas sai nu’udar banku komersiál ne’ebé mak bele atende interese populasaun timór nian, la’os de’it iha zona rurál, maibé mós iha zona hirak urbana, mak aprezenta tiha ona, iha sorumutu estraordináriu Konsellu Ministrus nia, planu estratéjiku ida no negósiu nian ne’ebé Ministeriu Ekonomia mak ka’er.
Institutu Mikro-finansas harii iha tinan 2001 hosi apoiu doadór sira nian liu hosi projetu ida kona-ba mikrofinansas hosi Banku Asiátiku Dezenvolvimentu nia ho objetivu atu hamenus móris kiak bainhira fahe finansiamentu no servisu hirak seluk ba iha populasaun hirak mukit.
Ho dezenvolvimetnu ne’ebé ita bele haree iha País ne’e, mak Institutu Mikro-finansas hahú ses-an hosi ninia objetivu ida uluk, hodi hamosu atribuisaun kréditu nian ne’ebé hetok sai bo’ot, hodi nune’e, iha tinan 2008, Banku Aziátiku Dezenvolvimentu rekomenda atu Institutu buka tok atu hetan lisensa bankária ida atu bele opera hanesan banku komersiál ki’ik-oan ida. Ho ida-ne’e, mak sei iha tinan 2008, asaun hirak Institutu Mikro-finansas nian transfere ba iha Governu Timor-Leste hodi bele hetan lisensa.
IV Governu Konstitusional oras ne’e estuda hela mekanizmu hirak adekuadu liu no bele tuir lejislasaun ne’ebé oras ne’e vigora hela atu transforma Institutu sai instituisaun kréditu nian ida.
