Ministru Prezidénsia Konsellu Ministrus no Interlokutór iha diskusaun Greater Sunrise, Agio Pereira, enkontru ho Reprezentante Espesiál Austrália ba Projetu Greater Sunrise, Steve Bracks, iha loron 19 fulan-jullu iha Darwin. 

Sorumutuk ne’e ho objetivu atu halo pontu situasaun no fahe informasaun no hanoin sira iha ámbitu sira-nia papél nu’udar reprezentante Timor-Leste no Austrália iha diskusaun inisiativa Greater Sunrise, nune’e mós konsidera saida mak iha períodu tuirmai no saida maka sira bele alkansa hamutuk.

Durante sorumutu ne’e, Steve Bracks ko’alia kona-ba ninia vizita daudaun ne’e iha  kosta súl Timor-Leste nian no fahe ninia impresaun no hanoin kona-ba instalasaun Baze Fornesimentu Suai iha futuru. Ministru Agio Pereira agradese ba Steve Bracks nia vizita iha kosta súl no komunidade ne’ebé lokaliza iha área projetu nian. Ministru Agio hato’o esperansa katak reprezentante na’in rua ne’e kontinua serbisu hamutuk hodi alkansa objetivus ne’ebé bele fó benefisiu ba nasaun rua, Timor-Leste no Austrália. 

Enviadu rua ne’e mós realiza vizita konjunta ida ba instalasoins prosesamentu onshore GNL Ichthys iha Bladin Point, besik Darwin, iha ne’ebé gas refrijeradu kampu Ichthys ne’e transforma ba líkidu. Vizita ne’e organiza husi Chris Wilson, Vise-Prezidente Seniór Operasoins INPEX.

Objetivu husi vizita ne’e mak atu observa besik liután instalasoins no montajen ba módulu hotu-hotu, ne’ebé mak importante tebes ba prosesu hotu-hotu, liuliu unidade likidasaun GNL 1 no 2. Durante vizita ba fábrika GLN, INPEX afirma katak presiza másimu tinan neen hodi instala módulu hotu-hotu no operasionál tomak, ho valór totál dolar amerikanu besik billaun 40. Ichthys LNG hanesan joint venture ida entre empreza grupu INPEX nian (operadór), parseiru prinsipál Totál Enerjia no subsidiária australiana CPC Corporation Taiwan, Osaka Gas, Kansai, Electric Power, JERA no Toho gas.