Reprezentante Espesiál Austrália nian ba Projetu Greater Sunrise, Steve Bracks, halo hela vizita mai Timor-Leste ho konvite husi Primeiru-Ministru, Kay Rala Xanana Gusmão, hodi observa diretamente implementasaun projetu integradu sira iha ámbitu inisiativa Tasi Mane, iha kosta súl Timor-Leste nian. Durante ninia vizita, realiza sorumutu ho Primeiru-Ministru no Vise-Primeiru-Ministru, Ministru Koordenadór ba Asuntus Ekonómikus, Ministru Turizmu no Ambiente, Francisco Kalbuadi Lay, ida-idak iha loron 17 no 18 fulan-jullu, hodi diskute progresu no kolaborasaun iha dezenvolvimentu kampus gás naturál no kondensadu Sunrise no Troubadour, ne’ebé koñesidu hanesan Greater Sunrise. 

Kampus Greater Sunrise, lokaliza kuaze 140 km iha kosta súl Timor-Leste, deskobre iha tinan 1974. Konsórsiu ne’ebé dezenvolve kampus Greater Sunrise (Sunrise Joint Venture) kompostu husi TIMOR GAP, ne’ebé ho partisipasaun 56,6%, hamutuk ho Woodside, ne’ebé iha partisipasaun ho 33,44%, no Osaka Gás Austrália ho partisipasaun 10%. Iha fulan-abríl tinan 2024, hahú halo estudu konsetuál ida ne’ebé lidera husi Wood Austrália, ne’ebé sei avalia opsaun di’ak-liu ba dezenvolvimentu, prosesamentu no komersializasaun gás nian, no tenke konklui to’o fin tinan 2024 ne’e. Dezenvolvimentu Greater Sunrise, no dada kadoras ba kosta súl Timor-Leste, hanesan prioridade nasionál no importante tebetebes ba kreximentu no dezenvolvimentu ekonómiku Timor-Leste iha futuru. 

Iha fulan-maiu, Primeiru-Ministru nomeia Agio Pereira, Ministru Prezidénsia Konsellu Ministrus, hodi sai nu’udar interlokutór iha diskusaun ho Steve Bracks, hanesan Reprezentante Espesiál husi Austrália ba dezenvolvimentu Greater Sunrise.

Durante sorumutu ho Primeiru-Ministru Xanana Gusmão, Steve Bracks ko’alia-liu kona-ba vizita ne’ebé realiza iha kosta súl ne’e hanesan oportunidade di’ak-tebes ida atu observa diretamente dezenvolvimentu iha rejiaun ne’e, hodi elojia Timor-Leste nia vizaun no esforsu. Nia reafirma tan kompromisu Governu australianu atu kontinua kolabora metin liu ho Timor-Leste hafoin lansamentu ba rezultadu estudu ne’e. 

Iha sorumutu ho Vise-Primeiru-Ministru, Steve Bracks informa ba governante ne’e kona-ba rezultadu husi ninia vizita ba kosta súl, ne’ebé konsidera pozitiva tebes. Manifesta mós vontade katak, hafoin rezultadu ba estudu konsetuál husi projetu ne’e, Timor-Leste no Austrália hala’o sorumutu filafali hodi avalia rezultadu no fó kontinuasaun ba kolaborasaun hamutuk. 

Vizita ba kosta súl ne’ebé realiza tanba konvite husi Primeiru-Ministru, sai hanesan objetivu prinsipál husi Steve Bracks nia prezensa iha Timor-Leste. Ne’ebé akompaña husi Ministru Petróleu no Rekursus Minerais, Francisco da Costa Monteiro, no Diretór Ezekutivu TIMOR GAP, Bracks observa progresu husi projetu ne’ebé la’o hela iha rejiaun ne’e.