Iha loron 15 fulan-jullu tinan 2024, Ministru Petróleu no Rekursu Minerais, Francisco da Costa Monteiro, akompaña husi Diretór Ezekutivu TIMOR GAP, E.P., no husi Autoridade Munisipál Kovalima, akompaña Steve Bracks, Reprezentante Espesiál Austrália nian ba Projetu Greater Sunrise, hala’o vizita ida ba fatin-xave iha kosta-súl, inklui baze abastesimentu Suai nian iha futuru, projetu abitasaun komunitária no operasaun perfurasaun onshore. 

Daudaun ne’e, sei hala’o hela levantamentu fíziku no investigasaun jeotéknika iha rai-maran no mós tasi-laran ba konstrusaun baze abastesimentu Suai, ne’ebé kobre rai ektares 414. Ninia rezultadu sei entrega hodi halo análize iha laboratóriu molok avansa ba prosesu lisitasaun iha fulan-agostu ka fulan-setembru.

Steve Bracks, ne’ebé konvida husi Primeiru Ministru, Kay Rala Xanana Gusmão, vizita kosta súl hodi observa implementasaun projetu integradu iha ámbitu inisiativa Tasi Mane. Vizita ne’e hamutuk ho dezenvolvimentu kontínuu estudu konsetuál husi empreza Wood, ne’ebé lokaliza iha Reinu Unidu.

Reprezentante Governu Austrália hakfodak ho investimentu ne’ebé hala’o husi Governu Timor-Leste iha Kovalima no rekoñese katak modelu dezenvolvimentu sei avalia tuir estudu konsetuál ne’ebé hala’o hela no iha diskusaun tékniku ne’ebé mós la’o daudaun. 

Ministru Francisco Monteiro hateten tan katak investimentu tuir faze iha kosta súl sei fasilita transporte Gás mai Timor-Leste no sei dezenvolve indústria petrolífera nasionál. Investimentu Governu sei hahú ho konstrusaun Aeroportu Suai, trosu inisiál ba autoestrada no baze abastesimentu Suai.

Iha tempu badak, Governu sei kontinua ho projetu autoestrada husi Kovalima to’o fatin planta LNG, komplexu petrokimiku no refinaria iha Natarbora. Infraestrutura ida ne’e hanesan komponente importante husi projetu kosta súl nian.

Vizita ne’e inklui mós fatin konstrusaun abitasaun komunitária iha suku Holbelis, iha Munisípiu Kovalima. Projetu ne’e prevee ona atu hala’o iha fulan-juñu to’o fulan-marsu tinan 2026. Ekipa mós observa modelu abitasaun komunitária ne’ebe harii ba vítima afetada sira husi prosesu konstrusaun aeroportu. 

Inspesiona mós posu petróleu Liurai nian, iha ne’ebé Timor Resources, hamutuk ho Timor GAP, E.P., halo ona diskoberta téknika husi kedas iha tinan 2021 no sei kontinua ba kestaun komersiál. Delegasaun mós vizita posu petróleu ne’ebé lokaliza iha Suai Loro.