REPÚBLICA DEMOCRÁTICA DE TIMOR-LESTE

IV Governo Constitucional

KOMUNIKADU BA IMPRENSA

Reuniaun Extraordinária Konsellu Ministru sira nian loron 26 fulan Abril tinan 2008

Konsellu Ministru sira nian halibur iha Sábado, 26 fulan Abril tinan 2008, iha Sala Reuniaun Konsellu Ministru nian, iha Palásiu Governu, Díli, no aprova:

1-Relatóriu Grupo Servisu nian ba Komisaun Funsaun Públika.

Konsellu Ministru sira nian analiza, diskuti no aprova relatóriu uluk ne’ebé produz husi Grupu Servisu ba Komisaun Funsaun Públika nian. Grupu ne’e hari’i husi proposta ne’ebé hato’o husi Primeiru-Ministru atu estabelese Komisaun ida ba Funsaun Públika.

Primeiru-Ministru pretende katak Komisaun ba Funsaun Públika ne’e sei hanesan autoridade estatutária independente nian ida, ho nia objectivu atu garanti funsaun públika ida haketak-an husi polítika no tur iha méritu, ho padroens profissional ne’ebé elevadu liu kapaz atu halao knar ne’ebé kualidade ba Governu no povu Timor-Leste.

2-Relatóriu Grupu Servisu Inspektur-Jeral Konaba hamoris Instituisaun Independente ida ba Auditoria Estadu nian.

Hahú tinan 2008 Governu fó sai katak sei introduz reforma institusional ida signifikativa, hodi bele promove governasaun ida ne’ebé diak no profesional iha Administrasaun Públika Timor-Leste nian. Inisiativa prinsipal ida maka proposta ne’ebé reforsa kompetênsia Gabinete Inspektur-Jeral (GIJ), ne’ebé sei kaer no halao knar Auditor Jeral Estado nian.

Primeiru-Ministru husu atu estabelese Grupo Servisu nian ida hodi estuda kestaun ida ne’e, ne’ebé aprezenta nia relatóriu ba Konsello Ministru sira nian, iha reuniaun ohin, ne’ebé propoen konaba hari’i Instituisaun Independente ida ba Auditoria Estadu nian, aprova tiha ona husi plenáriu.

Konsellu Ministru sira nian analiza mós:

3 – Aprezentasaun konaba alternativa sira atu minimiza impaktu ba aumentu folin iha populasaun

sira ne’ebé susar liu.

Folin fóz no mina-rai ne’ebé sa’e iha mundo fó impaktu negativu iha Timor-Leste. Iha kontextu ne’e, Primeiru-Ministru husu atu grupu ida husi tékniku sira nian bele aprezenta alternativa sira ne’ebé diak atu hare’e ba nesesidade urjente sira iha planu ba seguransa alimentar, ba material konstrusaun nian no mós kombustível. Governu pretende atu asegura ba produtu sira ne’e atu labele falta iha rai-laran ho nune’e labele fó impaktu negativu ba folin iha populasaun ne’ebé susar liu. Konsello Ministru sira nian mós rona no analiza proposata sira ba tempu badak, tempu klaran no mós tempu naruk ne’ebé aprezenta husi grupo servisu nian.