Husi loron 7 to’o loron 10 fulan-jullu tinan 2024, Ministru Negósius Estranjeiru no Kooperasaun, Bendito dos Santos Freitas, akompaña Prezidente Repúblika, José Ramos-Horta, hala’o vizita Estadu ba Angola, ho objetivu atu hametin relasaun bilaterál entre Timor-Leste no Angola. 

Delegasaun Timor-Leste nian simu iha Aeroportu Internasionál Luanda husi Ministru Negósius Estranjeirus Angola, Téte António, no husi Embaixadór Angola iha Timor-Leste, José Andrade de Lemos. Vizita ida-ne’e inklui atividade no sorumutu oioin ho altu nivel ne’ebé foka liu kooperasaun entre país rua.

Iha loron 8 fulan-Jullu, Ministru Bendito Freitas partisipa iha palestra ida ne’ebé hato’o hosi Prezidente José Ramos-Horta iha Akademia Diplomátika “Venâncio de Moura”, ne’ebé destina ba membru akademia diplomátika angolana no figura relevante sira-seluk. No iha loron hanesan, Xefe Estadu ho Governante ne’e simu iha Asembleia Nasionál. 

Nune’e mós iha loron 8 fulan-Jullu, Ministru Bendito Freitas no Prezidente José Ramos-Horta presta omenajen iha Monumentu Memoriál António Agostinho Neto, hodi rekoñese importánsia istóriku no kulturál hosi fundadór nasaun angolana nian. 

Momentu ida ne’ebé signifikativu liu iha vizita ne’e maka asina akordu izensaun vistu ba titulár pasaporte servisu no diplomátiku entre Timor-Leste no Angola. Akordu ne’e, asina husi Ministru Negósiu Estranjeiru husi país rua ne’e, sei fasilita mobilidade diplomata no sei hametin kooperasaun bilaterál. Asina mós memorandu entendimentu ida hodi estabelese kooperasaun iha área konsulta polítika diplomátika, nune’e mós akordu ida entre Akademia Diplomátika “Venâncio de Moura” no Sentru Estudu Diplomátiku Timor-Leste. 

 Durante vizita, Ministru Bendito Freitas akompaña Xefe Estadu iha inaugurasaun ofisiál Embaixada Timor-Leste iha Angola. Serimónia ne’e marka pasu importante ida iha relasaun diplomátika, ne’ebé simboliza amizade no kooperasaun ne’ebé duradoura (metin liután) entre país rua ne’e. 

Ministru Bendito Freitas partisipa mós iha vizita ida ba Institutu Superiór Siénsia Polisiál no Kriminál (ISCPC) iha Angola, iha ne’ebé diskute ona kolaborasaun posivel iha área formasaun no seguransa. 

Vizita ne’e remata ho desizaun atu kria komisaun konjunta ida entre Timor-Leste ho Angola, ne’ebé sei envolve ekipa téknika ida hosi liña ministeriál sira, atu diskute no promove koperasaun iha setór estratéjiku sira hanesan petróleu, turizmu, agrikultura no formasaun rekursu umanu. Komisaun ida-ne’e sei serbisu hodi trasa planu asaun ida ne’ebé sei fó benefísiu ba país rua.