Iha, loron 5 fulan-jullu tinan 2024, Embaixada Repúblika Koreia iha Dili, entrega ekipamentu eletróniku ne’ebé hanesan doasaun ba Ministériu Negósius Estranjeirus no Kooperasaun Timor-Leste. 

Serimónia ofisiál entrega ne’e hala’o iha Salaun Nobre Ministériu Negósius Estranjeirus no Kooperasaun no marka prezensa husi Embaixadór Repúblika Koreia nian iha Dili, Shin Man-Taek, no Diretór-Jerál Asuntus Bilaterais ba Ázia no Oseánia, Marcos da Costa. 

Durante serimónia, Embaixadór Repúblika Koreia nian entrega simbolikamente ba Diretór-Jerál Asuntus Bilaterais ba Ázia no Oseánia ekipamentu eletróniku oioin, inklui komputadór sekretária nian hamutuk 170, komputadór portatil 60, impresora 60 no projetór 12. 

Lori Ministériu Negósius Estranjerus no Kooperasaun nia naran, Diretór-Jerál Marcos da Costa hato’o agradesimentu boot liu ba Governu no povu Repúblika Koreia ba sira-nia laran-luak, apoiu no kontributu ne’ebé iha valór. “ekipamentu sira-ne’e, laiha dúvida, sei hadi’a asesu ba informasaun no fasilita funsionamentu loroloron Ministériu nian,” nia afirma. “Ida ne’e reprezenta liu fali teknolojia de’it; ida ne’e signifika kompromisu kontínuu ida ba progresu no inovasaun.”