Reprezentante husi Ministériu Saúde Timor-Leste hamutuk ho reprezentante sira Estadus-membrus ASEAN nian, husi loron 1 to’o 5 fulan-jullu, iha Vientiane, Laos, hodi partilla no diskute medida nasionál sira ne’ebé habelar no intensifika ba prevensaun, preparasaun, detesaun no resposta ba moras sira. 

Sorumutu Funsionáriu Importante sira ASEAN nian ba da-18 kona-ba Dezenvolvimentu Saúde (SOMHD, sigla iha lian inglés) foka liu ba kestaun pendente sira ne’ebé presiza halo akordu entre país sira hosi ASEAN, ASEAN Plus Three no ASEAN – Xina.

Kreximentu no mudansa ne’ebé lais iha ASEAN ne’e hamosu dezafiu ba sistema saúde Estadus-Membrus nian, ne’ebé inklui populasaun barak-liu, poluisaun no problema sira kona-ba saúde ambientál. Moris-ki’ak ne’e mós kontinua sai fatór determinante importante ida ba kondisaun saúde, liuliu ba grupu marjinalizadu no vulneravel sira, inklui sira ne’ebé moris iha komunidade remota, izoladu, foho no illa ka área sira ne’ebé ki’ak ho rekursus. 

Responsavel sira to’o iha konsensu kona-ba konvokasaun konferénsia husi Ministru Saúde sira ASEAN nian hodi deskreve polítika no orientasaun estratéjiku sira ne’ebé sei permite rejiaun hodi responde ho efikás ba dezenvolvimentu foun no senáriu sira ne’ebé bele akontese. Sira mós salienta importánsia hosi kooperasaun internasionál ne’e.