Governu Timor-Leste

Prezidente Parlamentu Nasionál, Maria Fernanda Lay, fó pose ba Rui Pereira nu’udar Komisáriu ba Komisaun Antikorrupsaun (KAK), iha serimónia ne’ebé hala’o ohin, loron 5 fulan-jullu tinan 2024, no marka prezensa husi Primeiru-Ministru, Kay Rala Xanana Gusmão. 

Rui Pereira eleitu ho votus maioria (41) husi Parlamentu Nasionál iha eleisaun ne’ebé hala’o iha loron 24 fulan-juñu liubá, ba períodu tinan 2024-2028.

Ho karreira jurídika ne’ebé hahú iha tinan 1996 nu’udár advogadu, Rui Pereira atua mós hanesan juis iha Tribunál Dili hosi tinan 2000 to’o tinan 2005, partisipa iha Komisaun Verdade no Amizade, no okupa funsaun asesoria iha instituisaun estatál sira. Husi tinan 2010 to’o tinan 2014, nu’udár Adjuntu Provedór ba Provedoria Direitus Umanus no Justisa (PDHJ, Sigla iha Lian Portugés), no hosi tinan 2016 to’o tinan 2018, ezerse kargu nu’udár Vise-Komisáriu KAK nian. 

Durante ninia mandatu tinan haat, Rui Pereira sei iha kolaborasaun ne’ebé metin ho Ministériu Públiku, Tribunál Rekursu no Ministériu Justisa atu fortalese kapasidade invetigasaun anti-korrupsaun iha país ne’e.

Serimónia simun pose ne’e sura ho prezensa husi Ministru Justisa, Sérgio da Costa Hornai, Vise-Ministru Assuntus Parlamentares, Adérito Hugo da Costa, no membru Parlamentu Nasionál sira seluk.