Primeiru-Ministru, Kay Rala Xanana Gusmão, iha loron 4 fulan-jullu tinan 2024, hala’o vizita ida ba Portu Baía Tibar, iha ne’ebé nia hato’o ninia apresiasaun ba serbisu ne’ebé jestór no funsionáriu sira iha portu nian hala’o ona. Akompaña husi Diretór Ezekutivu Timor Port SA, Rafael Ribeiro, Primeiru-Ministru hetan oportunidade hodi haree besik liután ba instalasaun/fasilidade no sistema verifikasaun no apoiu entrada no saída merkadoria nian. 

Durante vizita ne’e, Primeiru-Ministru ko’alia-liu importánsia Portu Baía Tibar ba dezenvolvimentu ekonómiku país nian, hodi hahi’i empeñu hosi funsionáriu sira ne’ebé permite operasionalizasaun portu durante oras 24 kada loron. 

Portu Baía Tibar, ne’ebé lokaliza kilómetru 10 husi parte oeste Dili, hanesan infraestrutura prioritária ida iha Planu Estratéjiku Dezenvolvimentu Nasionál (PEDN) 2011-2030. Ne’ebé inaugura iha tinan 2022, portu ne’e substitui Portu Dili, hodi fasilita movimentu importasaun no esportasaun merkadoria ho kapasidade karga kontentór millaun ida kada tinan. 

Iha loron hanesan, Primeiru-Ministru inaugura ai-lalete ekoturístikus, ne’ebé harii husi Timor Port SA, iha zona ai-parapa Tibar, Turleu, suku Tibar, postu administrativu Bazartete, Likisá.

Durante serimónia ne’e, Xanana Gusmão subliña importánsia hodi prezerva ambientál no apela ba komunidade atu tau matan ba ai-parapa, áreas ne’ebé, uainhira konserva didi’ak, bele atrai vizitantes no kontribui ba dezenvolvimentu lokál. Primeiru-Ministru mós salienta kompromisu Governu nian ho dezenvolvimentu sustentavel no hateten katak konstrusaun infraestrutura bele la’o-hamutuk ho protesaun ambientál, no afirma katak ida-ne’e hanesan ezemplu ida husi koordenasaun di’ak ne’ebé bele halo entre públiku no privadu – entre Estadu no empreza sira – ba dezenvolvimentu sustentavel nasionál. 

Diretór Ezekutivu Timor Port, Rafael Ribeiro, hahi’i vizaun no empeñu Primeiru-Ministru nian iha projetu Portu Tibar, no hateten importánsia kuda filafali ai no konserva ambiente hanesan parte hosi kontratu konsesaun parseria públiku-privadu nian.

Prezidente Autoridade Munisipál Likisá, Paulino Ribeiro, agradese ba Timor Port ba konservasaun ai-parapa no tau importánsia atu fó kuidadu ba ekosistema ida-ne’e hodi atrai turista no hetan reseita ba ekonomia.  

Ai-lalete ekoturístikus Tibar, daudaun ne’e sei loke ba públiku loro-loron hahú husi tuku 8:00 to’o tuku 19:00, ho kustu entrada dolar 1 kada vizitante.