Sorumutu Jornada Orsamentu 2025 hodi prepara Orsamentu Jerál Estadu (OJE) 2025 sei hala’o iha loron 5 fulan-jullu 2024, iha Auditóriu Kay Rala Xanana Gusmão, iha Ministériu Finansas, Dili.

Jornada Orsamentu 2025, ho tema “Investe iha infraestrutura estratéjiku, hakbi’it ekonomia no hadi’ak sidadaun nia moris-di’ak”, ho objetivu atu define prioridade sira Governu nian no tetu fiskál ba tinan 2025.

Eventu ne’e sei hahú iha tuku 8:30 dadeer no sei iha diskursu abertura husi Primeiru-Ministru, Xanana Gusmão. Sesaun daruak sei analiza materia makroekonómiku, estratéjia fiskál no dezempeñu setór finanseiru. Iha parte dadeer, sei aprezenta mós propostas ba prioridades, despezas obrigatórias no senárius ba tetu fiskál 2025. Iha loraik, partisipantes iha enkontru ida-ne’e sei diskute tópiku sira ne’ebé aprezenta no sei define prioridades no tetu fiskál ba OGE 2025 nian.

Tuir prioridade ne’ebé define, liña ministeriál sei prepara sira-nia proposta orsamentu setoriál atu bele analiza hosi Komisaun Revizaun Orsamentu, entre loron 12 no 27 fulan-agostu tinan 2024.