Governu, liuhosi Sekretaria Estadu ba Formasaun Profisionál no Empregu (SEFOPE) iha parseria ho Programa Nasoins Unidas ba Dezenvolvimentu (PNUD), organiza Feira Karreira no Edukasaun iha loron 28 no 29 fulan-juñu tinan 2024. Eventu ida-ne’e realiza iha ámbitu Projetu Kompeténsia ba Empregu no Empreendedorizmu Juveníl (YEES, sigla iha lian inglés), ne’ebé finansia hamutuk husi Ajénsia Kooperasaun Internasionál Koreia (KOICA), Ministériu Komérsiu no Indústria, no PNUD. 

 Feira Karreira no Edukasaun ne’e ho nia objetivu atu fornese informasaun abranjente kona-ba oportunidade ba dezenvolvimentu profisionál, edukasaun, formasaun profisionál, palestra kona-ba karreira no oportunidade bolsa estudu ba indivíduu, kandidatu ba empregu, estudante no sira ne’ebé foin termina lisensiatura. 

Eventu durante loron rua ne’e, partisipante sira bele esplora espozisaun empregadór, instituisaun públika, sentru juveníl, sentru ba formasaun no universidade sira, atu nune’e promove fahe informasaun esensiál hodi dezenvolve sira-nia karreira.

Serimónia abertura ne’e konta ho prezensa husi distintu dignitáriu sira, inklui Sekretáriu Estadu ba Formasaun Profisionál no Empregu, Rogério Araújo Mendonça; Sekretáriu Estadu ba Dezenvolvimentu Lokál Mateus dos Santos Tallo; Reprezentante Vise-Primeiru-Ministru no Prezidente Konsellu Administrasaun Autoridade Turizmu Timor-Leste, Virgílio Smith; Prezidente Autoridade Munisipál Ermera, José Martinho Santos Soares; Reprezentante Rezidente PNUD iha Timor-Leste, Adeline Carrier, Jestora ba Programa KOICA Timor-Leste, KIM Jieun, no konvidadu sira seluk.