Iha Segunda-feira, loron 24 fulan-juñu tinan 2024, Ministériu Negósius Estranjeirus no Kooperasaun, lidera husi Vise-Ministra Asuntu ASEAN, Milena Maria da Costa Rangel, no UN Women, organiza “Fórum Lideransa no Diplomasia iha Femininu” hodi selebra Loron Internasionál Feto iha Diplomasia. Eventu ne’e iha diálogu nivel aas ida tuir fali ho jantar, halibur diplomata seniór no emerjente sira no mós líder feto sira.~

Durante eventu ne’e, selebra kontribuisaun notável sira hosi feto sira hodi forma kompromisu internasionál sira no avansa dezenvolvimentu sustentável no dame. Eventu ne’e promove diskusaun sira kona-ba oinsa ultrapasa barreira estruturál sira no promove igualdade jéneru iha diplomasia no asuntu internasionál sira. 

Ho aprezentasaun istória susesu sira hosi líder feto sira iha diplomasia, objetivu maka atu inspira no kapasita líder sira iha futuru, hodi promove ambiente ida ne’ebé apoia sira nia ambisaun iha polítika, diplomasia no asuntu públiku sira.