Ministru Petróleu no Rekursus Minerais, Francisco da Costa Monteiro, sai sasin ba asinatura akordu asionista ida entre Murak Rai Timor Empresa Pública (MRT, E.P.) no Estrella Resources ba esplorasaun bloku minerál tolu iha Munisípiu Lautein. Serimónia asinatura ne’e hala’o iha loron 27 fulan-juñu tinan 2024, iha Timor Plaza, Dili. 

Prezidente MRT, E.P., José Manuel Gonçalves, destaka katak akordu ida-ne’e hanesan rezultadu husi diskusaun ne’ebé kle’an dezde fulan-novembru tinan 2023. Asinatura ba termu referénsia orienta prosesu ne’e, hodi to’o iha akordu asionista ida-ne’e.

Chris Daws, Diretór Jerál Estrella Resources nian, espresa otimizmu kona-ba kolaborasaun ida-ne’e, hodi afirma katak investigasaun preliminár sira hatudu potensiál pozitivu iha kampu minerál sira.

Akordu ne’e estabelese kriasaun empreza konjunta ida, ho Murak Rai Timor kaer asaun 30% no Estrella Resources 70%. Governu sei la finansia atividade sira esplorasaun nian, ne’ebé sei inklui identifikasaun, avaliasaun, interpretasaun no kuantifikasaun ba rezerva minerál sira iha bloku tolu iha Lautein. MRT, E.P. iha kompromisu atu kontinua apoia atividade esplorasaun sira iha futuru, tanba rekursu metáliku nasionál sira hatudu katak sira viavel. 

Ministru Francisco da Costa Monteiro felisita parte rua kona-ba akordu, subliña katak akordu ida-ne’e sei apoia intensifikasaun esforsu sira atu esplora rekursu minerál nasionál sira, hodi kontribui ba dezenvolvimentu ekonómiku no kriasaun kampu traballu, aleinde hamenus dependénsia ba reseita hosi setór petrolíferu.

Ministru destaka mós katak akordu ne’e marka faze inisiál ida ba atividade sira iha futuru no sei tulun timoroan sira hetan abilidade foun iha teknolojia sira ne’ebé relasiona ho esplorasaun minerál.