Iha loron 25 fulan-juñu tinan 2024, iha Kuala Lumpur, Ministru Negósius Estranjeirus no Kooperasaun, Bendito dos Santos Freitas, ne’ebé akompaña husi Embaixadór Timor-Leste iha Malázia, Lisualdo Gaspar, vizita empreza estatál malaia mina-rai no gás, Petronas. Durante vizita ne’e, asiste aprezentasaun ida kona-ba evolusaun esplorasaun mina-rai no gás nian, tantu iha rai-maran (‘onshore’) nune’e mós iha tasi (‘offshore’), iha ámbitu vizita ofisiál governante nian ba país ne’e.

Petronas, instituisaun estatál ida ne’ebé hari iha tinan 1974, iha esperiénsia barak durante tinan 50 iha produsaun mina-rai no gás, tantu ‘offshore’ nune’e mós ‘onshore’, hodi mantein relasaun ida metin no pozitiva ho merkadu mundiál. Susesu ida-ne’e, iha parte ida tanba apoiu polítiku ne’ebé konsistente hosi Governu Malázia.

Ministru Bendito dos Santos Freitas foka-liu kona-ba dispozisaun Malázia nian ne’ebé liuhusi Petronas, hodi konvida Ministru Petróleu, Rekursus no Minerais Timor-Leste atu halo vizita ida, ho objetivu atu fahe esperiénsia sira iha área indústria petrolífera.