Iha loron 25 fulan-juñu tinan 2024, Ministru Negósius Estranjeirus no Kooperasaun, Bendito dos Santos Freitas, reprezenta Ministru Transporte no Komunikasaun, Miguel Manetelo, ofisialmente formaliza Akordu Servisu Aéreu (ASA) ho Governu Malázia, hodi reforsa konektividade transporte aéreu entre nasaun rua ne’e. 

Akordu ne’e asina ho Ministru Transportes Malázia, Yang Berhormat Loke Siew Fook, iha okaziaun vizita ofisiál Ministru Bendito Freitas nian ba nasaun ne’e.

Governante ne’e afirma katak ho asinatura ofisiál Akordu Servisu Aéreu nian, iha futuru, tékniku sira husi Timor-Leste no Malázia sei bele prepara aan di’ak liután hodi fasilita operasaun vou sira entre Dili no Kuala Lumpur, no vise-versa.

Akordu ida-ne’e iha importánsia boot, tanba sei kontribui ba dezenvolvimentu setór konektividade aérea Timor-Leste nian no sei permite fahe esperiénsia téknika ho profisionál sira aviasaun sivíl nian.

Partisipa iha serimónia asinatura akordu ASA ne’e, Sekretária Komersiál Embaixada Timor-Leste iha Malázia, Adelina Martins, Prezidente Autoridade Aviasaun Sivíl Timor-Leste, no seluk tan.