Sekretáriu Estadu Arte no Kultura, Jorge Soares Cristovão, ho ninia ekipa ministeriál no reprezentante UNESCO iha Jakarta no iha Timor-Leste, hala’o diskusaun ida kona-ba posibilidade kandidatura Timor-Leste nian ba Patrimóniu Mundiál. Sorumutu ida-ne’e sura ho prezensa husi Moe Chiba, reprezentante UNESCO iha Timor-Leste no mós Rizky Fardhyan, reprezentante UNESCO iha Jakarta, liuhusi videokonferénsia.

Sorumutu ne’e, fahe esperiénsia no diskute aspetu tékniku sira, no sura ho partisipasaun reprezentante husi ministériu oioin no servisu governamentál sira, inklui Ministériu Turizmu no Ambiente, Ministériu Agrikultura, Pekuária, Peskas no Florestas, liuhusi Sekretaria Estadu Florestas no Ministériu Administrasaun Estatál.

Sekretáriu Estadu esplika katak “ami-nia país ratifika konvensaun tolu UNESCO nian: konvensaun tinan 2003, konvensaun tinan 2005 no konvensaun tinan 1972”, no akresenta katak “daudaun ne’e, ami intensifika hela esforsu sira, liuliu iha ámbitu konvensaun tinan 1972 nian”, hafoin salienta ninia importánsia ba Timor-Leste, tanba ninia objetivu atu intensiva prezervasaun ba beins kulturál no naturál sira ne’ebé konsidera importante ba umanidade. 

Jorge Soares Cristovão refere mós katak Sekretaria Estadu “servisu hamutuk ho liña ministeriál sira hotu atu identifika no rejista ami-nia lista kandidatura sira ne’ebé maka bele ba Patrimóniu Mundiál”.

Entre fatin sira ne’ebé maka avalia hela atu bele integra iha lista kandidatura ba Patrimóniu Mundiál maka legadu kulturál sira ne’ebé importante hanesan ain-fatin arkeolójiku sira iha Tutuala, nusa-oan Jaku, Foho Ramelau no uma tradisionál sira (Uma Lisan).

Sekretáriu Estadu afirma katak “durante sorumutu ida-ne’e, ita fahe mós esperiénsia sira kona-ba oinsá atu identifika no selesiona fatin sira ne’ebé bele atu inklui iha lista provizória ne’e. Salienta mós katak “la ko’alia de’it kona-ba kestaun turizmu, maibé mós envolve arkeólogu no istoriadór sira atu ajuda ita hodi identifika no rejista patrimóniu sira-ne’e ba UNESCO iha Paris”.