Sorumutuk Konsellu Ministrus nian iha loron 26 fulan-juñu tinan 2024
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian, iha loron 26 fulan-juñu tinan 2024
Konsellu Ministrus hala’o sorumutu iha Palásiu Governu, Dili, no hahú sorumutu ho aprezentasaun ida husi Dili Development Company, Grupu Jape nian, kona-ba planu expansaun kompleksu komersiál “Dili Sentrál”, ne’ebé inklui Sentru Komersiál Timor Plaza. Planu ne’e prevee konstrusaun ba edifísiu turístiku no korporativu oin-oin.
****
Tuirmai aprezentasaun ida husi Ministra Finansas Santina José Rodrigues F. Viegas Cardoso, kona-ba Planu Tinan-Lima Ministériu Finansas nian
Planu ne’e ho objetivu atu aumenta kapasidade Ministériu nian hodi fó apoiu ba instituisaun estatál sira seluk iha jestaun efisiente finansas públikas nian. Hahú hosi ninia kriasaun durante administrasaun ONU nian iha tinan 2001, Ministériu Finansas Timor-Leste dezenvolve ona ninia kapasidade hodi apoia instituisaun estatál sira seluk iha jestaun finansas públikas. Planu Tinan-Lima ne’e la reflete de’it progresu sira ne’ebé alkansa ona, maibé ko’alia mós kona-ba dezafiu sira ne’ebé mosu hanesan rekuperasaun pós-pandemia COVID-19 no impaktu husi dezastre klimátiku, ne’ebé foka-liu ba nesesidade atu hametin sistema finanseiru públiku hodi promove dezenvolvimentu sustentável no reziliénsia ekonómika iha Timor-Leste.
****
Grupu traballu projetu “Escola Superior de Educação (ESE) Raiz” halo aprezentasaun ida kona-ba antesedentes, objetivus no futura asaun sira ba dezenvolvimentu projetu. Projetu ida-ne’e ho objetivu atu fó formasaun kualidade ba profesór sira iha lian portugés, atu sira bele atua iha sistema edukativu hodi kolabora iha melloria prosesu ensinu no aprendizajen iha nivel edukativu sira hotu.
****
Ministru Petróleu no Rekursus Minerais, Francisco da Costa Monteiro, no Prezidente Konsellu Administrasaun TIMOR GAP, E.P. – Timor Gás & Petróleu, E.P., Rui Maria Alves Soares, halo aprezentasaun ba Konsellu Ministrus kona-ba Planu Atividades Timor Gap nian.
Entre atividade sira ne’ebé prevee iha planu ne’e maka fortalesimentu no dezenvolvimentu institusionál no rekursus umanus, nune’e mós estabelesimentu ba parserias estratéjikas. Entre prioridade sira ne’e ida maka dezenvolvimentu kampu Greater Sunrise, ho implementasaun kadoras mai Timor-Leste. Diskute mós projetu sira ba esplorasaun no dezenvolvimentu bloku potensiál sira iha rai-maran (Onshore) no iha tasi (Offshore), aleinde planeamentu infraestrutura sira ne’ebé presiza atu apoia projetu Tasi Mane. Partilla mós informasaun jerál sira kona-ba projetu Greater Sunrise.
****
Ikusliu, Ministra Finansas, Santina José Rodrigues F. Viegas Cardoso, aprezenta kalendáriu reuniaun Komité Revizaun Orsamentál nian, iha ámbitu preparasaun Orsamentu Jerál Estadu ba tinan 2025. Reuniaun ne’e sei hahú hosi loron 12 to’o 17 fulan-agostu tinan 2024. REMATA
