Timor-Leste simu vizita ofisiál husi Ministra Justisa Portugál, Rita Alarcão Júdice, hosi loron 7 to’o loron 9 fulan-juñu tinan 2024, ho objetivu atu reforsa kooperasaun bilaterál, liuliu iha ámbitu reforma ba setór justisa.

Ministra Justisa portugeza partisipa iha atividade oioin no sorumutu ofisiál sira, ne’ebé destaka resepsaun ofisiál husi Primeiru-Ministru, Kay Rala Xanana Gusmão, no husi Ministru Justisa, Sérgio de Jesus da Costa Hornai, iha sala sorumutu Gabinete Fronteiras Marítimas no Terrestres, iha Palásiu Governu, Dili. Sorumutu ida-ne’e sura mós ho prezensa husi Ministru Negósius Estranjeirus no Kooperasaun, Bendito dos Santos Freitas, no Koordenadora Grupu Traballu Reforma Justisa, Lúcia Lobato. Iha sorumutu ne’e, diskute mós akordu ida ba futuru ne’ebé sei asina iha tempu besik entre país rua ne’e iha ámbitu reforma ba setór justisa.  

Durante vizita, asina mós Protokolu Konsesaun Terras nian ida, ne’ebé fó direitu ba Estadu Portugés atu hetan terrenu iha Dili, ne’ebé ho objetivu atu konstroi instalasaun foun Eskola Portugeza nian iha Dili – Sentru Ensinu no Língua Portugeza Ruy Cinatti (EPRC-CELP, Sigla iha Lian Portugés). Inisiativa ida-ne’e ho objetivu atu hatán ba prokura no interese ne’ebé aumenta ba beibeik ba instituisaun ne’e, hodi reforsa importánsia ensinu língua portugeza no kooperasaun iha área edukasaun entre país rua. Protokolu ne’e asina husi Ministru Justisa Timor-Leste, Sérgio Hornai, no husi Ministra Justisa Portugál, Rita Alarcão Júdice, iha auditóriu Ministériu Justisa.   

Iha ninia diskursu, Ministra Rita Alarcão Júdice destaka importánsia husi “asinatura direitu ba superfísie ida, durante tinan 99, atu harii Eskola Portugeza foun ida iha Dili, hodi reforsa importánsia ensinu língua portugeza ne’ebé nu’udar investimentu esensiál ida ba Timor-Leste”. 

Dezlokasaun Rita Júdice nian mai Timor-Leste inklui mós partisipasaun iha selebrasaun Loron Portugál, Camões no Komunidade nian, ne’ebé hala’o iha Likisá, iha loron 8 fulan-juñu.