Ministériu Negósiu Estranjeiru no Kooperasaun (MNEK) liu husi kolaborasaun ho Austrália nia programa Parseria ba Prosperidade Inklusivu (PROSIVU), organiza workshop kona-ba “Timor-Leste nia Adezaun no Integrasaun ba Komunidade Ekonómia ASEAN – Negosiasaun Komérsiu no Investimentu” husi loron 24 to’o 28 Juñu 2024 iha Otel Novo Turismo, Dili, Timor-Leste.
Timor-Leste ho dilijente prepara an no kumpri hodi adere ba akordu protokolu no mos kuadru jurídiku sira iha âmbitu ASEAN, inklui mos Komunidade Ekonómia ASEAN nian. Rekezitu sira ne’ebé sei kumpri mak hanesan asesu merkadu ba sasan no serbisu nian , movimentu ema no investimentu. Hodi apoiu esforsu hirak nee, MNEK,nuudar ministériu koordenador adezaun ba ASEAN nian hamutuk ho PROSIVU, programa husi Austrália nian organiza ofisiais husi governu no mos ministériu relevante sira nunee mos pesoal negosiador tékniku sira, hodi tuir formasaun durante loron lima ho rigorozu konaba negosiasaun komersiu no investimentu nian. Formasaun nee sei eleva koñesimentu no abilidade partisipante sira hodi dezenvolve kalendáriu konaba Timor-Leste nia asesu ba merkadu ASEAN nian no mos sei ajuda hodi prepara no envolve an iha diskusaun no negosiasaun signifikante sira haktuir husi kalendáriu Estadu Membru ASEAN nian. 
Vise-Ministra ba Asuntu ASEAN nian, Milena Rangel afirma “Timor-Leste totalmente iha kompromisu hodi sai membru plenu ASEAN no garanti ho kapasidade sufisiente hodi implementa kompromissu ASEAN nian ho sentidu hodi alkansa objetivu integrasaun rejional. Wainhira ami inisia serbisu konaba kalendáriu adezaun ba merkadu nian, haktuir husi rekerimentu mapa roteiru nian, formasaun konaba negosiasaun komersiu no investimentu ASEAN nian, nee sai momentu oportunu tebes hodi ajuda Governu ho kompetênsia nesesária sira hodi prepara kalendáriu ho susesu iha prosesu negosiasaun ba ASEAN.”
Iha okaziaun hanesan, Adjunta Xefe Missaun Embaxada Austrália iha Timor-Leste subliña “parte importante husi adezaun ba ASEAN mak negosiasaun, asina no implementa intrumentu legais importantes sira, hodi hetan rezultadu ne’ebe di’ak liu iha komérsiu no ekonomia Timor-Leste nian. Austrália sei kontinua apoiu Timor-Leste nia jornada iha adezaun ba ASEAN, no hakarak atu kontinua fornese apoiu ba Governu Timor-Leste hodi lori Timor-Leste iha prosesu ba adezaun no integrasaun ASEAN nian.”