Vise-Primeiru-Ministru no Ministru Negósius Estranjeirus Nova Zelándia, Winston Raymond Peters, halo vizita ofisiál mai Timor-Leste iha loron 12 fulan-juñu tinan 2024 no simu husi Primeiru-Ministru ein Ezersísiu no Vise-Primeiru-Ministru, Ministru koordenadór Asuntus Ekonómikus no Ministru Turizmu no Ambiente, Francisco Kalbuadi Lay, hodi diskute kooperasaun entre país rua. 

Durante konferénsia imprensa hamutuk ne’ebé hala’o iha edifísiu Ministériu Turizmu no Ambiente, Primeiru-Ministru ein Ezersísiu afirma katak nu’udar “onra boot ida iha oportunidade hodi simu Vise-Primeiru-Ministru Nova Zelándia”, país ida ne’ebé “sai ona belun di’ak-tebes, hodi kontribui no tulun ita durante ita-nia luta ba independénsia  no, tuirmai, iha konstrusaun ba ita-nia país”,  ho apoiu “iha área oioin hanesan edukasaun, kapasitasaun rekursus umanus, nune’e mós iha área defeza no sira seluk tan”. 

Vise-Primeiru-Ministru Nova Zelándia espresa ninia gratidaun ba oportunidade hodi hasoru malu ho Primeiru-Ministru ein Ezersísiu Timor-Leste nian, hodi subliña katak “kompromisu kontínuu Nova Zelándia nian atu apoia ekonomia Timor-Leste, liuliu liuhusi dezenvolvimentu rurál, edukasaun no turizmu”. Winston Peters felisita mós Timor-Leste nia adezaun ba Organizasaun Mundiál Komérsiu (OMK)  no reforsa apoiu Nova Zelándia nian  atu Timor-Leste adere ba ASEAN. 

Winston Peters hala’o sorumutu mós ho Ministru Negósius Estranjeirus no Kooperasaun, Bendito dos Santos Freitas, no Vise-Ministra ba Asuntus ASEAN, Milena Rangel, hodi diskute kooperasaun bilaterál iha área oioin.

Vise-Primeiru-Ministru Nova Zelándia simu mós husi Prezidente Repúblika, José Ramos-Horta, iha ne’ebé hala’o sorumutu ida ho nia hodi diskute kestaun rejionál no globál lubuk ida.