Ministru Negósius Estranjeirus no Kooperasaun, Bendito dos Santos Freitas, iha loron 13 fulan-juñu tinan 2024, asina akordu kooperasaun ida ho Embaixadór Japaun iha Timor-Leste, Tetsuya KIMURA, ba grupu Projetu Bolsa Estudu da-7 ba Dezenvolvimentu Rekursus Umanus (JDS). Asinatura ne’e inklui Akordu Troka Notas no Akordu Subvensaun ida ho Ajénsia Kooperasaun Internasionál Japaun (JICA). 

Projetu JDS ne’e hahú iha tinan 2019, benefisia ona funsionáriu timoroan sira hamutuk 35, 22 husi sira maka kompleta ona sira-nia mestradu iha Japaun. Akordu foun ne’e sei permite funsionáriu nasionál na’in-8 tan maka atu kontinua sira-nia estudu iha Japaun iha área polítika públika, servisu administrativu, polítika industriál, polítika ambientál no jestaun rekursus naturais ne’ebé sei hahú tinan oin. 

Dezenvolvimentu rekursus umanus ne’e inklui iha kontestu adezaun Timor-Leste ba ASEAN, nu’udar área kooperasaun ida ne’ebé importante tebetebes, tanba rekursus umanus maka baze ba dezenvolvimentu no prosperidade ba nasaun ida.