Timor-Leste no Tailándia Hametin Relasaun Bilateral no Asina Akordu ba Livre Vistu Turista
Ministru Negósius Estranjeirus no Kooperasaun, Bendito dos Santos Freitas, hala’o vizita ofisiál ida ba Reinu Tailándia iha loron 20 no 21 fulan-juñu tinan 2024, ne’ebé konvida husi ninia omólogu tailandés, Maris Sangiamponsa, ho objetivu atu hametin relasaun bilaterál entre Timor-Leste no Tailándia.
Durante vizita, Ministru Bendito Freitas no Ministru Maris Sangiamponsa hala’o enkontru bilaterál ida ne’ebé foka-liu ba haluan kooperasaun iha área prinsipál oin-oin, inklui saúde, agrikultura, edukasaun no dezenvolvimentu rekursus umanus. Tailándia reafirma ninia apoiu adezaun Timor-Leste nian ba ASEAN. 
Momentu ida ne’ebé signifikativu liu husi vizita ne’e mak asinatura akordu ba livre vistu turista entre Timor-Leste no Tailándia. Akordu ida-ne’e sei permite katak sidadaun sira husi país rua refere, ne’ebé iha pasaporte komún, bele hela to’o loron 30 hodi hala’o atividade turizmu, sosa sasán no hala’o estudu la presiza vistu. Akordu ne’e sei tama iha vigór hafoin ratifikasaun husi Parlamentu Nasionál país rua ne’e nian. Livre vistu ba pasajeiru husi país rua ne’e molok ne’e aplika ona ba sidadaun sira ne’ebé ho pasaporte servisu no pasaporte diplomátiku. 
Ministru Bendito Freitas vizita mós Universidade Kasetsart, iha ne’ebé nia asiste aprezentasaun ida kona-ba investigasaun ne’ebé realiza iha nivel inovasaun no teknolojia ne’ebé aplika ba setór agrikultura no peskas. Universidade ne’ebé harii ona durante tinan 80, manifesta ninia interese atu koopera ho Timor-Leste no simu estudante timoroan sira hodi hakle’an koñesimentu no prátika iha área agrikultura no peskas. 
Delegasaun timoroan inklui mós Embaixadór Timor-Leste iha Tailándia, Juvêncio de Jesus Martins, Diretora-Jerál ba Asuntus ASEAN, Elia da Silva, no Diretór Nasionál ba Sudeste Aziátiku, Vânio Ximenes.
Hafoin vizita ba Tailándia, Ministru Bendito Freitas sei kontinua ninia misaun diplomátika ho vizita ofisiál ba Malázia no Singapura, husi loron 24 to’o 28 fulan-juñu tinan 2024, hodi hatán ba konvite husi ninia omólogu sira. Diskusaun iha país rua ne’e sei foka iha hametin kooperasaun ekonómika, bilaterál no multilaterál, no mós iha dezenvolvimentu ba parseria sira iha futuru, liu-liu iha área kapasitasaun rekursus umanus, edukasaun, saúde, infraestruturas no konektividade.
