Ministériu Transportes no Komunikasoins Timor-Leste sente orgullu hodi anunsia ba susesu aterrajen Sistema Kabu Submarinu Súl Timor-Leste (TLSSC-sigla iha lian inglés) iha segunda-feira, loron 24 fulan-juñu tinan 2024. Eventu istóriku ida-ne’e hatudu avansu makaas ida iha infraestrutura telekomunikasaun nian iha país, ne’ebé halo koneksaun Timor-Leste ba Sistema Kabu Norueste (NWCS, sigla iha lian inglés), propriedade husi Vocus , Austrália. 

TLSSC ne’e hanesan sistema ida kabu fibra ótika telekomunikasaun nian iha tasi okos ne’ebé avansadu liu, ne’ebé projeta hodi suporta kapasidade transferénsia ida ba dadus terabits 27 kada segundu (Tbps) entre Timor-Leste no Austrália. Kabu ne’e iha nia naruk kilómetru 607, inklui repetidores hitu no iha kabu ramifikasaun ida ba rejiaun Greater Sunrise. Konstrui ho kuidadu tebes husi Alcatel Submarine Networks (ASN) husi Fransa, lider globál ida iha teknolojia rede submarina nian.

Projetu TLSSC ne’e subliña kompromisu Timor-Leste nian hodi hadi’a konektividade dijitál, promove kreximentu ekonómiku no hadi’a kapasidade komunikasaun nian tantu ba indivíduu nomos ba empreza sira. Infraestrutura foun ida-ne’e sei hamenus laténsia (atrazu) ne’ebé makaas no sei aumenta velosidade internet nian, hodi hahú era transformasaun dijitál foun ida ba país ne’e. 

Atu fó omenajen ba eroi nasionál sira, Konsellu Ministrus, iha ninia sorumutu iha loron 5 fulan-juñu tinan 2024, deside ona atu dedika naran sira ba repetidores no unidade remifikasaun ba eroi no eroina nasionál sira hanesan tuirmai ne’e: Saudoza Maria Udu Bele “Maria Tapó”; Saudoza Rosa Bonaparte Soares “Muki”; Saudoza Dukce Maria da Cruz “We-We”; Saudozu Fernando de Araújo  “Lasama”; Saudozu Espíritu Santo; Saudozu José da Silva; Saudozu Venâncio Ramos Amaral Ferraz, no Saudozu Nelo Kadomi Timor. Eventu dedikasaun ida-ne’e sei realiza iha loron 22 fulan juñu tinan 2024, iha Portu Dili. 

Sua Exelénsia Miguel Marques Gonçalves Manetelu, Ministru Transportes no Komunikasoins Timor-Leste, deklara: “Ohin, ita selebra konkista monumentál ida ne’ebé sei promove Timor-Leste ba era konektividade foun ida. TLSSC ne’e la’ós de’it kabu baibain ida; nia hanesan liña moris nian ida ne’ebé sei liga ita-nia nasaun ba mundu, fó oportunidade ba kreximentu, inovasaun no dezenvolvimentu ne’ebé seidauk iha. 

Koneksaun ba NWCS ne’e sei permite Timor-Leste bele aproveita infraestrutura telekomunikasaun husi Austrália ne’ebé forte, hodi garante asesu ba internet ho velosidade aas ne’ebé konfiavel. Hein katak, dezenvolvimentu ida-ne’e bele atrai investimentu foun, apoia hasa’e ekonomia dijitál no hadi’a kualidade moris sidadaun sira hotu nian.

Eventu aterrajen kabu ne’e sei konta ho diskursu husi autoridade governamentál importante sira, reprezentante sira husi ASN no parte interesada sira husi indústria telekomunikasaun. Serimónia ne’e sei foka-liu ba esforsu kolaborativu ne’ebé halo projetu ida-ne’e sai realidade ida no sei selebra futuru konektividade ida ne’ebé nabilan iha Timor-Leste.