Governu Timor-Leste

REPÚBLICA DEMOCRÁTICA DE TIMOR-LESTE

IV GOVERNO CONSTITUCIONAL

KOMUNIKADU BA IMPRENSA

SORUMUTUK EKSTRAORDINÁRIU KONSELLU MINISTRU LORON 18 FULAN MARSU TINAN 2008

Hala’o ohin Tersa-feira, loron 18 fulan Marsu tinan 2008, sorumutuk ekstraordináriu Konsellu Ministru sira Governu buka hato’o ba Prezidente Repúblika interinu hodi hanaruk tan estadu de esesaun ne’e, ba fali estadu emerjénsia, ba períodu loron tolunulu nia laran.

Proposta Governu ne’e atu estadu emerjénsia ne’e hala’o iha teritóriu nasionál tomak hahú 00h00 iha loron 23 fulan Marsu oin mai no hotu iha oras 24h00 loron 22 fulan Abril, ho restrisaun ba direitu, liberdade no garantia sidadaun sira nian hanesan tuir mai ne’e:

Halo limitasaun ba direitu atu halo sirkulasaun livre no iha obrigasaun atu tama uma obrigatóriu entre tuku 23h00 to’o tuku 5hoo hodi salvaguarda direitu hirak prevé tiha ona iha alinea c) no f) n.º1 artigu 3.º Lei n.º 3/2008, loron 22 fulan Fevereiru;

Halo restrisaun ba direitu atu halo manisfestasaun no reuniaun hodi salvaguarda direitu hirak ne’ebé prevé tiha ona iha alinea d), e) e f) n.º1 artigu 3.º Lei n.º 3/2008, loron 22 fulan Fevereiru; direitu manifestasaun no reuniaun;

Bainhira iha mandatu judisiál no respeita regra hirak hakerek iha alinea b) n.º1 artigu 3.º Lei n.º 3/2008, fulan Fevereiru, autoridade kompetente sira bele sai tama uma maske konsagra tiha ona atu ema ida labele tama ema seluk nia uma sein iha autorizasaun hosi nia nain;

Tuir proposta ne’ebé hato’o ba Prezidente Repúblika interinu, Governu koalia mós kona-ba F-FDTL tenke iha responsabilidade atu fó apoiu ba autoridade sivil sira, liu hosi komandu Konjuntu mak harí tiha ona, hodi hala’o misaun espesifiku koordenasaun no halo intervensaun operasionál hodi kaer suspeitu sira ne’ebé ho pratika krime nian ne’ebé komete tiha ona iha loron 11 fulan Fevereiru liu ba, no hola medidas hodi estabelese hikas fali normalidade demokrátika. Heten katak F-FDTL no PNTL, tama hodi hala’o operasaun dauduan ne’e, tenke kumpri regra sira nu’udar hakerek iha Lei n.º3/2008, loron 22 fulan Fevereiru hatudu tiha ona, iha Dekretu-Lei n.º 2/2007, loron 8 fulan Marsu, kona-ba Operasaun Prevensaun Kriminal, Dekretu-Lei n.º 4/2006, loron 1 fulan Marsu kona-ba rejime espesiál bainhira iha Terorizmu, Kriminalidade Violenta ka Altamente Organizada.

Fo hanoin katak Deklarasaun Estadu Sítiu, ne’ebé Dekreta iha loron 11 fulan Fevereiru liu ba, tanba atentadu hasoru Prezidente Repúblika no Primeiru-Ministru, presiza hodi garante orden konstitusionál seguransa no paz públiku ne’ebé sai fali hahalok violentu no hodi defende Estadu Direitu Demokrátiku. Estadu Esesaun ne’e, dekretadu no renovadu tiha ona tutuir malu no konsege impede ameasa ba estabilidade País nian, asegura orden públiku, hamenus ninia forsa, no fo limite ba sira iha área ne’ebe identifika tiha ona. Nune’e, maske ameasa hirak ne’e menus no lokalizada tiha ona maibé seidauk lakon hotu, tanba sei iha ema grupu balu mak sei halai ho kilat no ekipamentu funu nian, grupu ne’e mak ida lidera hosi eis porta voz petisionáriu Gastão Salsinha ne’ebé sai mós hanesan suspeitu iha atentadu hasoru seguransa Estadu no titulár nain rua órgaun soberania nian.

Kaptura no aprezentasaun grupu armadu ida ne’e ba justisa mak sei kontinua nafatin hanesan orden ida ne’ebé tenke hala’o hodi hametin paz públiku, maibé, ida ne’e presiza lori tempu tan no, pasiénsia, ho objektivu atu evita fakar ra’an ne’ebé mak la folin buat ida, atu la haluha katak ameasa ne’e sei la iha tan ona hodi país ida ne’e bele la’o hikas fali iha dalan dezenvolvimentu nian.