Ministru Prezidénsia Konsellu Ministrus no Interlokutór iha diskusaun kona-ba Greater Sunrise, Agio Pereira, ohin loron 20 fulan-juñu tinan 2024, hala’o sorumutu ho Andy Drummond, Vise-Prezidente Woodside Energy, liuhosi videokonferénsia, hodi diskute pontu situasaun no dezenvolvimentu ba Greater Sunrise.

Reuniaun ne’e konta ho partisipasaun husi reprezentantes parseirus Joint Venture nian, hanesan Antonio Dos Santos, Diretór Nasionál Woodside iha Timor-Leste, David Reid, Diretór-Jerál ba Avaliasaun no Dezenvolvimentu APAC no Prezidente Komité ba Sunrise Joint Venture, Rui Soares, Prezidente no CEO hosi Timor GAP, Otsuka Yo, Diretór Ezekutivu ba Osaka Gas Austrália, Rod Lake, Diretór Komersiál ba Osaka Gas Austrália no Ika Moniz, Asesora Prinsipál no Asesora Polítika no Relasoins Públikas ba Gabinete Ministru Prezidénsia Konsellu Ministrus.

Durante reuniaun ne’e atualiza informasaun kona-ba progresu Sunrise Joint Venture no aprezenta vizaun jerál ida kona-ba estudu konsetuál Sunrise nian, ne’ebé hahú ona iha fulan-abril liubá.

Ministru Agio Pereira ko’alia kona-ba ninia knaar nu’udar interlokutór iha diskusaun kona-ba Greater Sunrise no salienta katak ida-ne’e maka projetu ne’ebé importante liu ba Timor-Leste. Prioridade Governu nian maka progresu iha dezenvolvimentu Greater Sunrise hodi masimiza kriasaun kampu servisu iha nasaun ne’e, tuir Programa Governu Konstitusionál IX. Ministru hateten mós katak, iha tempu badak, atu konkretiza vizaun ida-ne’e, Governu sei nafatin envolve iha negosiasaun ho empreza sira ne’ebé envolve iha prosesu Greater Sunrise, hanesan prevee ona iha Tratadu Fronteira Marítima entre Timor-Leste ho Austrália, hodi implementa rejime espesiál ba kampus Greater Sunrise liuhosi kadoras ba Timor-Leste.

Reuniaun ho Woodside Energy no parseiru sira seluk joint venture nian ida-ne’e reflete abordajen foun ida, ne’ebé marka ho mentalidade ida ne’ebé nakloke no konstrutiva liu iha diskusaun kona-ba Greater Sunrise.

Partisipante sira hotu konkorda hodi hala’o reuniaun barak liután iha futuru, ho objetivu atu reforsa kapasidade hosi parte hotu-hotu atu hamutuk hetan solusaun reál no substansiál ba dezenvolvimentu Greater Sunrise nian.

Woodside, empreza australiana setór enerjia nian, hanesan parte hosi konsórsiu ba dezenvolvimentu kampus Greater Sunrise (Sunrise Joint Venture) ho partisipasaun 33,44%, hamutuk ho TIMOR GAP ne’ebé iha 56,6%, no Osaka Gas Australia ho partisipasaun 10%.

Kampu gás naturál no kondensadu Sunrise no Troubadour, ne’ebé hamutuk koñesidu hanesan kampus Greater Sunrise, lokaliza besik kilómetru 150 iha sudeste Timor-Leste nian no kilómetru 450 iha norueste Darwin, iha Territóriu Norte Austrália nian.