Primeiru-Ministru, Kay Rala Xanana Gusmão, partisipa nu’udár oradór prinsipál iha Forum Lider Globál, ne’ebé hala’o iha ámbitu aniversáriu Konferénsia Nasoins Unidas kona-ba Komérsiu no Dezenvolvimentu (UNCTAD) nian ba da-60. Ho tema husi eventu ne’e “Trasa dalan foun ida ba dezenvolvimentu iha mundu ida ne’ebé iha hela mudansa”, ne’ebé hala’o hosi loron 12 to’o 14 fulan-juñu, iha Jenebra, Suisa.

Reprezenta Prezidente Repúblika, José Ramos-Horta, Primeiru-Ministru afirma katak “dezde ninia kriasaun iha tinan 1964, UNCTAD iha ona liña frente ba mudansa ekonómika no jeopolítika, hodi luta ba sistema ekonómiku ida ne’ebé justu liu”.

Primeiru-Ministru salienta mós katak “Aniversáriu UNCTAD ba da-60 fó mai ita oportunidade atu diskute abordajen foun sira hodi enfrenta dezafiu sira “atualidade nian, iha “mundu ida iha ne’ebé konflitu no dezorden akontese barak tan de’it, iha ne’ebé país dezenvolvidu sira aplika direitu internasionál ho forma seletiva”. Aleinde ne’e, ita enfrenta “emerjénsia klimátika ida ne’ebé kauza husi país industrializadu sira, maibé ninia impaktu boot-liu ba país sira ne’ebé iha hela dezenvolvimentu”. Iha tempu hanesan, “ita iha ekonomia globál ida ne’ebé hakiak no hakle’an dezigualdade ne’ebé makaas tebes”.

Xefe Governu destaka importánsia husi abordajen ba dezenvolvimentu inkluziva no kondús husi país sira ne’e rasik, hodi realsa kriasaun ba g7+, grupu ida husi país frajil sira ne’ebé fahe esperiénsia no defende lian komún iha senáriu internasionál.

Xanana Gusmão destaka katak adezaun Timor-Leste ba Organizasaun Mundiál Komérsiu, foin lalais ne’e “sei ajuda integrasaun nasionál iha ekonomia globál”. Nia Elojia mós Estratéjia UNCTAD nian hodi Apoia Estadu Illa Ki’ik sira ne’ebé iha hela Dezenvolvimentu (SIDS), “ne’ebé fornese kuadru ida ba dezenvolvimentu sustentavel, diversifikasaun ekonómika no konstrusaun ba reziliénsia”.

Primeiru-Ministru apela “ba Nasoins Unidas no ba UNCTAD atu esplora abordajen ida ne’ebé di’ak-liu hodi fornese apoiu no asisténsia, atu nune’e loke odamatan dame no dezenvolvimentu nian ba país frajil sira-ne’e”, no subliña presiza UNCTAD hetan “apoiu polítiku ne’ebé nesesáriu hodi dezempeña ninia papél no trasa modelu foun ida ba dezenvolvimentu internasionál”.