Primeiru-Ministru Kay Rala Xanana Gusmão, partisipa iha Sesaun Plenária Simeira Pás nian ba Ukránia, ne’ebé hala’o iha loron 15 no 16 fulan-juñu tinan 2024, iha Bürgenstock, Suisa. 

Simeira ne’e, halibur lider mundiál besik 60 no reprezentante Governu 90, termina ho deklarasaun konjunta ida ne’ebé reafirma integridade territoriál Ukránia nian no apela inkluzaun hosi parte sira hotu atubele hetan dame.

Durante ninia diskursu, Primeiru-Ministru destaka katak, “direitu internasionál nu’udar fundamentu ba pás no orden globál”, hodi defende katak “tenke aplika direitu internasionál ho forma ida de’it ba nasaun hotu-hotu, no Estadu hotu-hotu tenke halo tuir direitu ne’e”. 

Xanana Gusmão foka-liu importánsia hodi ko’alia kona-ba konflitu sira hotu ho preokupasaun ne’ebé hanesan, no afirma katak “ita iha obrigasaun morál hodi diskute no iha preokupasaun ne’ebé hanesan ba konflitu sira hotu”.

“Daudaun ne’e iha mundu funu besik 65 mak akontese. Maske haree ba dook hosi ita-nia país rasik, ita la bele haluha funu hirak ne’e”, afirma Xefe Governu, hodi reafirma presiza atu “mantein promesa justisa iha direitu internasionál no buka hodi hetan dame”.