Governu Timor-Leste

Ministru Prezidénsia Konsellu Ministrus no Interlokutór iha diskusoins Greater Sunrise nian, Agio Pereira, ohin hala’o sorumutu ho reprezentantes husi kompañia petrolífera japoneza INPEX, iha loron 18 fulan-juñu tinan 2024, iha Palásiu Governu, Díli. 

Durante enkontru ne’e, Reprezentante INPEX iha Timor-Leste, Yosuke Ueda, aprezenta membrus hosi ninia ekipa no halo aprezentasaun badak ida kona-ba esperiénsia kompañia ne’e iha setor enerjétiku no ninia misaun iha Timor-Leste. Aleinde reprezentante INPEX iha Timor-Leste, partisipa mós iha sorumutuk ne’e konsultores INPEX husi eskritóriu Dili, Broadie Sugai no Suzana Cunha. 

Ministru Agio mós Kongratula INPEX ne’ebé iha loron 3 fulan-juñu tinan 2024 lansa ona ninia eskritóriu foun iha Timor-Leste. Ministru Agio hatete katak abertura eskritóriu INPEX hanesan pasu pozitivu ida atu mantein liña koordenasaun ne’ebé besik liu ho stakeholders sira hotu hanesan ANP, Timor Gap no ho Governu, liuhosi Ministru Petróleu no Rekursus Minerais, Francisco da Costa Monteiro no Ministru Agio rasik nu’udar reprezentante espesiál husi Governu Timor-Leste ba Greater Sunrise. 

Iha sorumutu ne’e, INPEX mós hatudu ninia interese ba dezenvolvimentu Greater Sunrise no dezenvolvimentu Kosta Súl nian.

INPEX rekoñese hanesan empreza esplorasaun no produsaun ba petróleu no gás ne’ebé boot-liu iha Japaun, ho esperiénsia barak iha dezenvolvimentu indústria petrolífera. Empreza ne’e halo ona investimentu iha setór enerjétiku iha nasaun oioin, inklui Indonézia no Austrália.