Sorumutuk Konsellu Ministrus nian iha loron 12 fulan-juñu tinan 2024
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian, iha loron 12 fulan-juñu tinan 2024
Konsellu Ministrus hala’o sorumutu iha Palásiu Governu, iha Dili, no hahú sorumutu ho aprezentasaun ida husi Álvaro Sardinha, konsultór espesialista iha ekonoia azúl no dezenvolvimentu sustentavel kona-ba “dezenvolve ekonomia azúl iha Timor-Leste”.
Inisiativa ne’e hanesan parte ida husi Semana Oseanu nian, ne’ebé iha lema kampaña nasionál “Ha'u-nia Tasi, Ha'u-nia Timor” ne’ebé hala’o iha loron 8 to’o 18 juñu tinan 2024, husi Gabinete Fronteiras Terrestres no Marítimas, iha lideransa Primeiru-Ministru nia-okos, Kay Rala Xanana Gusmão.
Aprezentasaun ne’e ho objetivu atu hatudu vantajen sira ne’ebé bele hetan husi dezenvolvimentu ekonimoa azúl ba dezenvolvimentu ekonómiku nasaun nian. Ekonomia azúl foka ba iha utilizasaun rekursu akuátiku (bee) no promove dezenvolvimentu ekonómiku, sustentavel, restauradór no rejenerativu, no rekoñese importánsia husi espasu akuátikus no sustentabilidade planeta ne’e.
Dezenvolvimentu ekonomia azúl iha Timor-Leste sei bele aumenta, maka hanesan, oportunidade ba inovasaun, empriendedorizmu, investimentu no dezenvolvimentu karreira profisionál.
Konsellu Ministrus agradese ba aprezentasaun no reforsa intensaun Governu nian atu kontinua promove esforsu hamutuk no dinámiku husi ministériu no ajénsia governamentál oioin, ba dezenvolvimentu ida susesu no sustentavel Ekonomia Azúl nian iha país.
******
Konsellu Ministrus delibera atu propoin ba Parlamentu Nasionál hodi nomeia Sr. Rui Pereira dos Santos, hanesan Komisáriu Komisaun Anti Korrupsaun, ba mandatu tinan haat.
******
Konsellu Ministrus aprova ona projetu Rezolusaun Governu nian ida ne’ebé aprova protokolu entre Repúblika Demokrátika Timor-Leste no Repúblika Portugeza kona-ba Eskola Portugeza Dili, ne’ebé asina iha loron 8 fulan-juñu liubá, aprezenta husi Ministru Justisa.
Liuhusi protokolu ne’e, Repúblika Demokrátika Timor-Leste oferese terrenu ho nia luan besik 15000m2, iha Kaikoli, ba Estadu Portugés hodi harii instalasaun Eskola Portugeza Dili. REMATA
