Kay Rala Xanana Gusmão, Primeiru-Ministru Repúblika Demokrátika Timor-Leste, hala’o sorumutu bilaterál ida ho Sua Majestade Sultaun Haji Hassanal Bolkiah, husi Brunei Darussalam, iha ninia vizita Estadu dahuluk mai Timor-Leste dezde estabelese relasaun diplomátika iha loron 20 fulan-maiu tinan 2002.

Vizita Estadu ida-ne’e marka aniversáriu ba da-22 relasaun diplomátika entre Timor-Leste no Brunei Darussalam no nu’udar okaziaun ida hodi hametin no promove relasaun ne’ebé di’ak tebetebes no kleur ona entre Timor-Leste no Brunei Darussalam. Objetivu jerál husi vizita ne’e atu hametin no dezenvolve liután relasoins no kooperasaun bilaterais.

Durante sorumutu ne’e, lider na’in-rua  hala’o diálogu ida ne’ebé produtivu  kona-ba asuntu oioin,  husikedas kestaun bilaterál to’o kestaun rejionál no internasionál ne’ebé sai interese mútuu. Lider rua ne’e mós iha ona akordu, atu esplora kooperasaun iha área ensinu superiór no siénsia, saúde, petróleu no rekursus minerais, nune’e mós dezenvolvimentu ekonómiku no investimentu.

Iha sorumutu ikus, lider na’in-rua asiste asinatura Akordu kona-ba Izensaun Vistu ba Titulár Pasaporte Diplomátiku no Ofisiál sira ka Servisu nian. Ho asinatura ba akordu ida-ne’e, Timor-Leste reforsa liután ninia relasaun bilaterál ho Brunei Darussalam no kumpre rekizitu sira izensaun vistu nian  iha ámbitu adezaun ba ASEAN.

Sua Majestade Sultaun Haji Hassanal Bolkiah, hosi Brunei Darussalam, akompaña husi delegasaun altu nivel nian ida ne’ebé komposta husi Ministru Negósius Estranjeirus II, Ministru Asuntus Internus, Ministru Gabinete Primeiru-Ministru no funsionáriu altu sira.