Timor-Leste marak prezensa iha Konferénsia Koordenasaun Komunidade Polítiku-Seguransa ASEAN nian ba da-16 (ASCCO da-16, akrónimu iha lian ingleza), ne’ebé hala’o iha Asede ASEAN nian iha Jakarta, loron 9 fulan-maiu tinan 2024. 

Objetivu prinsipál hosi sorumutu ne’e mak atu analiza implementasaun Planu Asaun ba Komunidade Polítiku-Seguransa ASEAN nian to’o tinan 2025, hodi diskute kona-ba kestaun transversal sira iha ASEAN nia laran.

Durante konferénsia ne’e, Timor-Leste fó énfaze ba papél krusiál ne’ebé Komunidade Polítiku-Seguransa ASEAN nian dezempeña iha promosaun diálogu, kooperasaun no estabilidade iha rejiaun ne’e. País ne’e hato’o gratidaun ba Sekretáriu ASEAN ne’ebé fahe ona informasaun kona-ba progresu Timor-Leste nian iha implementasaun planu asaun no agradese ba Estadu-Membru hotu-hotu ASEAN nian no Sekretariadu ASEAN ne’ebé apoia ninia estatutu membru plenu iha ASEAN. 

Marka prezensa iha reuniaun ne’e, lider SOM (Reuniaun Funsionáriu Boot) ASEAN, órgaun setoriál sira APSC nian no entidade sira ne’ebé iha ligasaun. Delegasaun Timor-Leste nian Diretora-Jerál ba Asuntus ASEAN, Elisa Maria da Silva maka xefia, ne’ebé akompaña hosi Natércia Coelho, Embaixadora Timor-Leste iha Misaun ASEAN nian iha Jakarta, Konselleiru Crisogno de Araújo, no Ajente Ligasaun ba ASEAN, Ivan Alves.