Ministériu Finansas hamutuk ho Ministériu Negósius Estranjeirus no Kooperasaun, no iha koordenasaun ho Gabinete Primeiru Ministru nian, sai uma-na’in ba Sorumutu entre Timor-Leste no Parseiru Dezenvolvimentu (TLDPM – sigla iha lian ingleza) tinan 2024 nian.  Eventu ne’e sei hala’o hosi loron 15 to’o 17 fulan-maiu tinan 2024, iha Auditóriu Kay Rala Xanana Gusmão, Ministériu Finansas, iha Aitarak Laran, Dili.

Ida-ne’e sei sai diálogu dahuluk nivel aas nian entre IX Governu Konstitusionál ho ninia parseiru dezenvolvimentu sira hahú kedas bainhira simu pose iha fulan-jullu tinan 2023. Ho ninia tema “Tempu halo Asaun: Planu ba Tinan Lima nian husi IX Governu Konstitusionál”, sorumutu ne’e sai hanesan plataforma atu hato’o no diskute kona-ba vizaun estratéjika no prioridade Governu nian ba tinan lima oinmai. Aleinde ne’e, sei hala’o diskusaun tékniku ba setór fundamentál haat, maka hanesan setór sosiál, ekonómiku, infraestrutura no fortalesimentu institusionál, ne’ebé ho objetivu atu hadi’a aliñamentu apoiu hosi Parseiru Dezenvolvimentu sira ho objetivu estratéjiku Governu nian.

Sorumutu ne’e prezide hamutuk husi Ministra Finansas, Santina Viegas Cardoso no Ministru Negósius Estranjeirus no Kooperasaun, Bendito dos Santos Freitas, TLDPM tinan 2024 nian ne’e sei konvida funsionáriu boot sira husi IX Governu Konstitusionál, membru Parlamentu Nasionál, reprezentante Korpu Diplomátiku, Parseiru Dezenvolvimentu, Setór Privadu, Organizasaun Sosiedade Sivíl sira, Akademia no Mídia sira.

Primeiru Ministru Kay Rala Xanana Gusmão sei halo aprezentasaun ida iha loron enserramentu nian, loron 17 fulan-maiu tinan 2024, hodi subliña empeñu Governu nian iha eventu ne’e no ninia importánsia.

TLDPM ne’e sei taka ho Meza Redonda ba Parseiru Dezenvolvimentu sira no sesaun ida ba pergunta no resposta, ne’ebé sei fó oportunidade ba kada Parseiru Dezenvolvimentu atu hato’o informasaun atualizada kona-ba sira-nia atividade no diskute aliñamentu ho prioridade estratéjika Governu nian.