Ministru Negósius Estranjeirus no Kooperasaun, Bendito dos Santos Freitas, iha kinta-feira ida-ne’e hala’o sorumutuk ho Prezidente Camões, Institutu Kooperasaun no Língua, IP, Ana Paula Fernandes, hodi fó inísiu ba serbisu negosiasaun Planu Estratéjiku Kooperasaun (PEC, sigla iha lian portugés) entre Timor-Leste no Portugál ba períodu 2024-2028. 

Iha sorumutuk ida-ne’e, parte rua diskute área estratéjika prioritária sira ba kooperasaun bilaterál iha ámbitu PEC foun ne’e, no reafirma importánsia hodi estende projetu kooperasaun ne’ebé la’o hela no inklui áreas foun atuasaun nian.

Sorumutuk preparatória ida-ne’e halo uluk enkontru individuál entre Misaun Camões ho Ministériu ida-idak, iha ne’ebé sei hakle’an diskusaun polítika setoriál sira. 

Prezidente Camões IP aprezenta mós ba Ministru Negósius Estranjeirus no Kooperasaun RDTL, dadus estatístikus kona-ba PEC 2019-2023 nian, no partilla konkluzaun no rekomendasaun sira hosi ninia Relatóriu Avaliasaun.

Marka mós prezensa iha sorumutuk ida-ne’e, Embaixadora Portugál iha Dili, Manuela Bairos, Vise-Prezidente Camões, Institutu Kooperasaun no Língua, IP, Ricardo Vitória, Adida ba Kooperasaun Embaixada Portugál iha Dili, Cristina Faustino no ninia ekipa téknika sira ba negosiasaun PEC.