Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, partisipa iha Konferénsia Internasionál Lider Relijiozu 2024 nian, ne’ebé hala’o iha Kuala Lumpur, Malázia, iha loron 7 fulan-maiu tinan 2024.

Iha ninia deklarasaun, Vise-Primeiru-Ministru salienta importánsia husi konferénsia ida-ne’e “atu halibur relijiaun oin-oin iha diálogu ne’e no promove fraternidade umana, uniaun no diversidade”, no haree-liu “nesesidade atu garante pás no estabilidade iha Mundu atu nune’e ema hotu-hotu bele moris livre, tuir sira ida-idak nia fiar”. 

Nia salienta mós katak Timor-Leste hanesan país dahuluk iha mundu ne’ebé ofisialmente adota Dokumentu kona-ba Fraternidade Umana hanesan «dokumentu nasionál», ne’ebé asina husi Papa Francisco no Grão Imã Al-Azhar Ahmed al-Tayyeb, iha loron 4 fulan-fevereiru tinan 2019, iha Abu Dhabi.

Hafoin partisipa iha Konferénsia Internasionál, Vise-Primeiru-Ministru no ninia delegasaun hala’o sorumutuk ho Vise-Primeiru-Ministru Malázia, Ahmad Zahid Hamidi, ho objetivu atu hametin relasaun bilaterál entre país rua ne’e. Iha sorumutuk ne’e, diskute kona-ba kontinuidade kooperasaun entre Malázia no Timor-Leste iha área oin-oin, hanesan Agrikultura, Saúde, Ekonomia, Defeza, Seguransa, no seluk tan.

Ahmad Zahid Hamidi hato’o dejezu atu vizita Timor-Leste iha tempu badak, ho objetivu atu hametin liután papél Malázia nian iha formasaun rekursus umanus iha setór dezenvolvimentu rurál.

Hafoin audiénsia ida-ne’e, Vise-Primeiru-Ministru, Mariano Sabino, hala’o mós sorumutuk ho Sekretáriu-Jerál Liga Mundiál Musulmana, Mohammad bin Abdulkarim Al-Issa, iha ne’ebé nia hato’o kompromisu Timor-Leste nian atu dezempeña papél ativu ida iha promosaun ba rekonsiliasaun, hodi subliña país ne’e hanesan ezemplu ida atu nasaun sira seluk bele banati tuir.