Primeiru-Ministru, Kay Rala Xanana Gusmão, hamutuk ho komunidade Manatutu no Vise-Governadór Provínsia Hunan, Zhang Jian Fei, iha loron 5 fulan-maiu tinan 2024, komemora tinan 10 amizade no kooperasaun entre sidade timorense Manatutu no Provínsia Hunan, Repúblika Populár Xina.
Primeiru-Ministru Xanana Gusmão hato’o gratidaun ba espíritu kooperasaun provínsia Hunan no salienta importánsia husi kooperasaun ida-ne’e atu promove dezenvolvimentu rejiaun nian.
Xefe Governu motiva mós populasaun Manatutu atu aprende ho téknika no esperiénsia ne’ebé Hunan lori mai atu esplora posibidades foun no promove progresu ekonómiku lokál. 
Iha eventu ne’e, Vise-Governadór Provínsia Hunan, Zhang Zian Fei, ko’alia-liu kona-ba istória naruk amizade entre Timor-Leste no Xina, ne’e eziste ona husikedas dinastia Ming, bainhira hahú estabelese lasu amizade ne’e ba dahuluk. Ko’alia-liu mós progresu signifikativu ne’ebé alkansa ona durante tinan 10 ikus, husikedas estabelesimentu ofisiál kooperasaun nian entre Hunan no Manatutu, ne’ebé hamosu projetu oioin ne’ebé hetan susesu iha área agrikultura, kultura no edukasaun.
Relasaun bilaterál entre Repúblika Populár Xina no Repúblika Demokrátika Timor-Leste, liu-liu ho munisípiu Manatutu, hametin ona ninia parseria estratéjika durante tinan barak, tuir saida mak estabelese ona iha Deklarasaun Konjunta entre país rua ne’e.
Durante selebrasaun ne’e anunsia ona reforsu ida iha kooperasaun amigavel entre Provínsia Hunan no Autoridade Munisipál Manatutu, hodi dezenvolve programa kooperasaun iha área oin-oin, inklui turizmu, interkámbiu kulturál, edukasaun, agrikultura no akuakultura. 
Serimónia ne’e mós inklui aprezentasaun kulturál kona-ba dansa husi Hunan no Manatutu, doasaun ekipamentus agríkolas, hanesan tratór no materiál edukativu sira ba Eskola Sekundária Públika Kay Rala Manatutu, foka-liu kompromisu kontínuu ba dezenvolvimentu sustentavel no fortalesimentu relasaun bilateral.
Selebrasaun ne’e sura ho prezensa husi membrus Governu balun, membrus Parlamentu Nasionál, reprezentante sira husi Forsas Defeza Timor-Leste (F-FDTL), Polísia Nasionál Timor-Leste (PNTL), Tribunál Rekursu, Korpu Diplomátiku no populasaun Manatutu nian.