IV GOVERNU KONSTITUSIONÁL
SEKRETARIA ESTADU kONSELLU MINISTRUS
……………………………………………………………………………………………………………………………
KOMUNIKADU IMPRENSA
Sorumutu Konsellu Ministrus loron 01 fulan Setembru 2010
Konsellu Ministrus hala’o sorumutu iha Kuarta-feira, loron 01 fulan Setembru tinan 2010, iha Sala Sorumutu, Palásiu Governu, iha Díli, no analiza:
1. Enkuadramentu Estratéjiku ba Dezenvolvimentu Rurál
Enkuadramentu Estratéjiku ba Dezenvolvimentu Rurál ne’e loke vizaun globál ida-ne’ebé konsentra iha komunidade hirak iha área rurál nian. Objetivu hosi dokumentu ne’e hetan reforsu hosi Portfóliu politika governu nian hirak ne’ebé mak bele serve nu’udar referénsia ba intervensaun Governu nian no parseiru dezenvolvimentu sira nian iha tempu oin-mai. Servisu ida-ne’e loke plataforma ida ba Governu, liu hosi Komisaun Interministeriál ba Dezenvolvimentu Rurál nian atu bele kordena dezenvolvimentu rurál iha nivel nasionál no halo mos armonizasaun ba atividade hirak hosi doadór sira tuir objetivu nasionál sira.
Atu dehan loloos katak populasaun Timor-Leste pursentu 75 hetan klasifikasaun hanesan ema ne’ebé móris iha zona rurál sira.
2. Rejime Jurídiku kona-ba atu fó sertifikadu ba Empreza sira no Emprezáriu hala’o Konstrusaun Sivil nian
Diploma hirak ne’e hakarak atu regula atividade setór konstrusaun sivil nian hodi konsagra dispozisaun hirak ho natureza téknika nian kona-ba sertifikadu, inskrisaun no kadastru ba sosiedade komersiál nian sira iha konstrusaun sivil ne’ebé hala’o sira nia atividade iha Timor-Leste.
Dokumentu ne’e koalia mós kona-ba,kompeténsia exkluziva Ministériu Infra-estrutura nian nu’udar entidade úniku ida ba prosedimentu sertifikasaun, kontrolu no fiskalizasaun ba atividade hirak hosi setór Konstrusaun Sivil nian.
3. Dekretu-Lei ne’ebé Aprova Alterasaun dahuluk Orgánika Ministériu Edukasaun nian
Dekretu-Lei 2/2008, loron 16 fulan Janeiru, fó kbiit ba Ministériu Edukasaun atu harii estrutura organizasaun nian ne’ebé presiza au dezenvolve polítika hirak dahuluk hosi IV Governu Konstitusionál nian kona-ba matéria Edukasaun no Kultura nian.
Uluk kedas mak Ministériu Edukasaun defini ninia plano estratéjiku ba médiu no longu prazu, bainhira nia elabora kuadru legál ida ne’ebé bele hatán ba ezijénsia hirak presiza nian, hodi adapta fila fali estrutura organizasaun Ministériu Edukasaun nian.
Nune’e mak, atu hatán ba dezafiu hirak mosu hosi dezenvolvimentu sistema edukasaun nian ida no ensinu ida-ne’ebé ho kualidade, hodi konsentra iha susesu eskola nian no iha modelu hanorin no aprendizajem ida-ne’ebé ás, mak Ministériu Edukasaun tenki iha estrutura funsionál no dinámika ida ne’ebé bele abranje territóriu tomak no bele defini di’ak liután ninia servisu sentrál, rejionál no distritál sira, atu nune’e bele hatán ba nesesidade hirak Eskola nian nomós ba responsabilidade ne’ebé mak hetan hosi lei ne’ebé oras ne’e aprova tiha ona.