Ministériu Saúde, ho apoiu husi UNICEF, UNFPA no Governu Austrália, iha loron 23 fulan-abríl tinan 2024, inaugura ona unidade nasionál dalimak ba Kuidadu Báziku Emerjénsia Obstetrísia no Neonatolojia, iha Sentru Saúde Gleno, Ermera, hodi responde ba dezafiu urjente sira ne’ebé afeta ba kuidadu maternu no neonatal iha Timor-Leste. Serimónia ne’e prezide husi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, ne’ebé akompaña husi Vise-Ministrus ba Fortalesimentu Institusionál Saúde no ba Operasionalizasaun Ospitais, José dos Reis Magno no Flávio Brandão. 

Unidade sira-ne’e esensiál atu fó kuidadu médiku urjente durante emerjénsia sira ne’ebé relasiona ho inan isin-rua, partu no bebé-foin-moris, inklui asisténsia ba partu seguru, tratamentu ba komplikasaun obstétrika, kuidadu neonatal báziku, monitorizasaun fetál (kosok oan ne’ebé forma iha inan nia knotak) no fornesimentu ekipamentu médiku sira ne’ebé esensiál. 

Unidade iha Ermera ne’e, hamutuk ho instalasaun haat seluk hanesan ne’ebé estabelese ona iha Likisá, Vikeke, Manufahi no Ataúru, ne’ebé dezempeña papél fundamentál ida hodi hamenus mortalidade materna no neonatal, garante kuidadu oportunu no adekuadu ba inan no bebé sira iha situasaun emerjénsia. 

Iha ninia diskursu, Vise-Primeiru-Ministru afirma katak, “unidade ba Kuidadu Báziku Emerjénsia Obstetrísia no Neonatolojia sira ne’ebé estabelese iha Servisu Kuidadu Primáriu Saúde ne’e sei hasa’e kapasidade servisu saúde no hadi’a kapasidade resposta ba inan isin-rua sira, iha momentu partu no hafoin-partu ho sira-nia bebé-foin-moris ne’ebé enfrenta komplikasaun ne’ebé ameasa sira-nia vida. Objetivu mak atu hamenus mortalidade materna no infantíl, bazeia ba prioridade sira ne’ebé aliña mós ho Objetivu Dezenvolvimentu Sustentavel (ODS, sigla iha lian portugés)”.