Vise-Primeiru-Ministru, Ministru Koordenadór Asuntus Sosiais, Ministru Dezenvolvimentu Rurál no Abitasaun Komunitária, Mariano ASSANAMI Sabino, marka prezensa iha aprezentasaun relatóriu estudu kona-ba artes marsiais no rituais, ne’ebé elabora husi ONG Belun no parseiru sira, ne’ebé hala’o iha loron 16 fulan-abríl tinan 2024, iha Sala Komisaun Nasionál Eleisoins, Dili. 

Iha ninia intervensaun, Vise-Primeiru-Ministru agradese ba ONG Belun no parseiru sira seluk ba elaborasaun husi estudu no relatóriu ida-ne’e, hodi rekoñese importánsia husi dadus sira ne’e atu apoia adosaun ba medidas governamentais relasiona ho tema ne’e, sempre ho foku ba moris-di’ak juventude Timor-Leste nian. 

 “Ko’alia kona-ba artes marsiais no rituais ne’e ko’alia kona-ba joven sira, nune’e estudu no relatóriu ida-ne’e sai ferramenta traballu ida ne’ebé importante atu Governu bele fundamenta ninia desizaun polítika bazeia ba dadus ne’ebé iha. Governu, liuhusi Komisaun Reguladora Artes Marsiais (CRAM – akrónimu iha lian portugés), esforsa hela atu halo levantamentu totál ida ba grupu sira no halo rejistu, atu nune’e, ho dadus hotu-hotu ne’ebé iha, bele define artes marsiais hanesan modalidade desportiva ida. Ida-ne’e mak objetivu”, dehan Vise-Primeiru-Ministru.

Daudaun ne’e, Governu suspende hela atividade artes marsiais no rituais, ho objetivu atu halo rejistu ba ninia membru sira no avaliasaun ba sira-nia dezempeñu, no hafoin konkluzaun ba relatóriu hosi CRAM, relatóriu ida-ne’e sei haruka ba Konsellu Ministrus hodi halo apresiasaun.

Joven sira ne’ebé envolve iha grupu sira-ne’e tenke hatudu dixiplina, promove pás no estabilidade, respeita liberdade movimentu ema seluk nian no labele halo terus ka hasai ema seluk nia vida.

 “Durante luta ba libertasaun nasionál, joven barak ne’ebé envolve iha organizasaun artes marsiais no rituais klandestinus kontribui ba libertasaun ita-nia pátria, tanba ne’e, joven sira ohin presiza asume responsabilidade ba sira-nia tempu ka jerasaun no kontribui ba libertasaun povu, sai asua’in ohin no futuru ba Timor-Leste”, afirma governante ne’e.

 “Ema ida-idak tenke prepara an iha dimensaun tolu: fízika, espirituál no mentál, atu nune’e bele sai ema ida ne’ebé enérjika, respeitoza no reziliente. Nune’e, iha dimensaun sira ne’e, joven sira sei forma sira-nia karákter atu sira sai ema ne’ebé util ba sosiedade”, konklui Vise-Primeiru-Ministru.

 Serimónia ba lansamentu ne’e sura ho partisipasaun hosi Sekretáriu Estadu Formasaun Profisionál no Empregu, Rogério Araújo Mendonça, reprezentantes ONG Belun no nia parseiru sira, no mós reprezentante sira husi Grupu Artes Marsiais no Rituais, Organizasoins Sosiedade Sivíl, no seluk tan.