Ministra Solidariedade Sosiál no Inkluzaun, Verónica das Dores, partisipa iha Sorumutuk Estraordinária Ministrus Traballu no Asuntus Sosiais Komunidade País Lian Portugés (CPLP – sigla iha lian portugés) nian ba da-1, ne’ebé hala’o iha loron 19 fulan-abríl tinan 2024, iha Sede CPLP, Lizboa. 

Sorumutuk Estraordinária ne’e ho objetivu atu fó kontinuasaun ba deliberasaun sira husi Sorumutuk Ordinária Ministrus Traballu no Asuntus Sosiais nian ba da-15, ne’ebé hala’o iha fulan-maiu tinan 2023, iha Benguela, Angola. Iha sorumutuk ne’e, sira diskute tema relevánsia oin-oin ba kooperasaun entre Estadus-Membrus CPLP iha ámbitu traballu no asuntus sosiais. 

Ko’alia-liu kona-ba kompromisu hamutuk atu “alkansa nivel dezenvolvimentu umanu ida ne’ebé aas, iha igualdade no sustentabilidade”, Ministra Verónica das Dores foka-liu esforsu Timor-Leste nian iha kombate ba traballu infantíl no iha implementasaun programa protesaun sosiál, hanesan Programa Bolsa da Mãe Condicional.

Governante ne’e afirma katak Timor-Leste iha kompromisu “atu konklui prosesu ne’ebé permite [Konvensaun Multilaterál Seguransa Sosiál CPLP nian] bele vigora lalais tuir posibilidade”, instrumentu ida ne’ebé konsidera “relevante tebetebes”. 

Verónica das Dores esplika evolusaun sistema seguransa sosiál nasionál nian, ne’ebé kria tinan 7 liubá, iha papél fundamentál ida atu garante protesaun ba traballadór sira no ba sira-nia família, no asume kompromisu atu “kontinua serbisu hodi hadi’a indikadór sira-ne’e no liuliu atu Seguransa Sosiál ne’e to’o ba traballadór sira hotu, nune’e mós sira ne’ebé iha setór informál”. 

Ministra salienta katak “akordu mobilidade, ne’ebé ita-nia país sira aprova ona, hodi permite mobilidade traballadór ne’ebé boot-liu iha espasu CPLP laran, ne’ebé nu’udar fundamentál ba sidadania no ba ita-nia ekonomia”, maibé “importante tebes atu traballadór sira no família labele lakon protesaun sosiál, tanba sira hela no serbisu iha país seluk”. 

Nia taka ninia intervensaun “ho liafuan agradesimentu ida ba país maun-alin sira hotu CPLP nian ba apoiu ne’ebé laiha rohan, husikedas momentu dahuluk, ba Timor-Leste no ba konsolidasaun Traballu Dignu no Seguransa Sosiál”.