Komisaun Funsaun Públika, hala’o tiha ona komemorasaun iha fulan Jullu ninia aniversáriu ba dahuluk, iha nia Planu Estratéjiku ne’ebé defini ba tinan liman oin mai. To’o tinan 2015, determina ona prioridade ne’ebé bele trasa Planu Aksaun nian.

Oras ne’e, sei dezenvolve  hela kuadru estratéjiku ida – planu dezenvolvimentu ida ne’ebé implika ba projetu oioin. Sira ne’e ida mak, fórmasaun no dezenvolvimentu ba rekursu umanu. “Tanba funsaun públika  sei aplika sistema kareira nian, ne’ebé funsionáriu sira sei hala’o sira nia kna’ar to’o hetan refórma no iha mós  posibilidade ba promosaun no progresaun iha kareiras, tenki iha mós fórmasaun kontínua, atu  nune’e sira bele hadi’a sira nia konesimentu no servisu ne’ebé mak sei hala’o daudaun, iha loro-loron”, haktuir Libório Pereira, Prezidente Komisaun Funsaun Públika”.

Projetu ida seluk mós atu hala’o ona, mak atu regula bolsa estudu ba funsionáriu públiku sira. Agora daudauk, Sekretaria Estadu ba Reforma Administrativa organiza ona bolsa estudu tuir Dekretu-Lei  ida, ne’ebé, tuir Libório Pereira, labele aplika husi departamentu  seluk. Objetivu  Komisaun  Funsaun  Públika nian atu haluan kompeténsia kona-ba fó bolsa estudu ba funsionáriu públiku sira, “atu  nune’e bele inklui ema hotu, tanba oras ne’e daudaun kada Ministériu organiza hela bolsa estudu  ne’ebé la hanesan no ida ne’e komplika ba servisu Komisaun nian. Promosaun sira, hanesan ezemplu, labele define tuir Ministériu ida-idak nian. Ita tenki iha lei jerál ida, ne’ebé bele aplika ba  hot-hotu, sein haree ba área ka ba espesialidade”, hatutan Prezidente KFP, nia hateten tan katak, hafoin halo hotu tiha estudu hirak ne’e, funsionáriu sei kontinua servisu ba instituisaun, pelumenus,  durante tinan tolu nia laran, karik oin seluk tenki selu fali investimentu ne’ebé halo husi Estadu, ka tuir valor bolsa estudu ne’e nian.

Libório Pereira dirije Komisaun Funsaun Públika hahú husi tempu ne’ebé sei responsabiliza hela  husi Ministériu Administrasaun Estatal no Ordenamentu Teritóriu. Nia fó sai katak Komisaun tenki  asumi ninia funsaun ho kuidadu, tanba poder ne’ebé mak fó ba Komisaun ne’e, “hanesan ezemplu:  poder ba rekrutamentu, nomeasaun, promosaun, disiplinar, hirak ne’e hotu mak funsaun Komisaun  nian. Ami ezerse fiar ida ne’e – ne’ebé Governu ne’e fó mai ami – ho kuidadu tomak”.

Prezidente Komisaun Funsaun Públika konsidera katak, iha tempu ba dala uluk nian, iha dezafiu  barak, liu-liu ba nível rekursu umanu no konesimentu. Estratéjia dezenvolvimentu ba KFP liu husi  regularizasaun ba funsionáriu temporáriu sira no husi fórmasaun.

Dezafiu seluk ne’ebe boot tebes mak instalasaun. Komisaun Funsaun Públika, ne’ebé oras ne’e,  hala’o iha Ministériu Administrasaun Estatal no Ordenamentu Teritóriu, okupa fatin ida mak limitadu  liu. Konkursu públiku ba konstrusaun edifísiu ba CFP fó sai tiha ona. “Ami hein katak bele iha ona edifísiu ne’e, molok remata tinan 2011. Ho instalasaun ne’ebé própriu, funsionamentu instituisaun  ne’ebé kontrola administrasaun públika sei mós sai diak dunik”, afirma Prezidente Komisaun  Funsaun Públika.