Objetivu ida husi Estatutu ne’ebé atu dezeña ba Universidade Nasionál Timor-Lorosa’e mak desentraliza fakuldade sira hotu ne’ebé dadaun ne’e konsentra hotu iha kapitál, Dili.

“Tamba UNTL mak  sai  hanesan  Universidade únika Estadu nian, ho nia funsaun atu kontribui ba dezenvolvimentu país nian, Konsellu Minsitru hanoin katak ladún di’ak Universiade nia fakuldade sira iha hotu de’it fatin ida, iha Dili. Ida ne’e importante tebes ba nivel sira seluk mós bainhira ita hakarak tama iha desentralizasaun,” Ministru Edukasaun João Cãncio Freitas esplika. Projetu ne’e previsto ona mós iha Planu Estratéjiku ba Dezenvolvimentu Nasionál.

Dadaun ne’e,  Universidade Nasionál iha fakuldade lima ( Fakuldade Siénsia Sosiál no Polítika, Fakuldade Enjeñaria, Fakuldade Agrikultura, Fakuldade Ekonomia no Fakuldade Siénsia Edukasaun ) no kursu rua ( Medisina no Direitu).Kursu Medisina nian seidauk enkuadra iha Fakuldade ruma. Hanesan mós ho kursu Direitu, ne’ebé FUP (Fundação das Universidades Portuguesas) mak tutela.

Iha ona previzaun atu iha Fakuldade hitu, hanesan: Fakuldade Agrikultura, Fakuldade Enjeñaria, Siénsia no Teknolojía, Fakuldade Medisina no Siénsia Saúde, Fakuldade Ekonomía no Jestaun, Fakuldade Edukasaun, Arte no Umanidade, Fakuldade Direitu no ikus liu Fakuldade Siénsia Sosiál.

Iha hanoin katak UNTL ninia Reitória tenke iha Dili, maibé tenke kria polu rejionál sira. Nune’e ne’e João Freitas konklui” polu rejionál sira sei kontribui la’ós de’it ba dezenvolvimentu rejionál maibé mós ba posibilidade ne’ebé di’ak liu kona-ba asesu ba ensinu superiór”.