REPÚBLIKA DEMOKRÁTIKA TIMOR-LESTE

IV GOVERNU KONSTITUSIONAL

Komunikadu imprenza

Sorumutu Konsellu Ministrus loron 14 fulan Novembru 2007

Konsellu Ministru hala’o sorumutu iha Kuarta-feira ne’e, loron 14 fulan Novembru, 2007, iha Sala Sorumutu Konsellu Ministru, iha Palásiu Governu, iha Díli, hodi aprova tiha :

1. Dekretu-Lei ne’ebé Aprova ona Orgánika Ministériu Saúde nian.

Organizasaun servisu Ministériu ne’e atu hadi’a asesibilidade no kualidade prestasaun servisu saúde, liu hosi desentralizasaun intervensaun operasionál servisu no instituisaun ne’ebé presta kuidadu saúde nian.

Konsellu Ministru mos aprova projektu ne’ebé haré hikas tiha ona tuir sujestaun hirak ne’ebé aprezenta hosi minsitru sira.

2.Proposta Rezolusaun atu hato’o ba Parlamentu Nasional hodi halo Adezaun Protokolu Kuioto ba Konvensaun Kuadru Nasoens Unidas Kona-bá Alterasaun Klimátika.

Tékniku Sekretaria Estadu Ambiente esklarese ba Konsellu Ministrus kona-bá implikasaun finanseira ba Timor-Leste bainhira halo adezaun ba Protokolu ne’ebé refere iha leten.

Protokolu Kuioto hakarak fó operasionalidade no efikásia jurídika ba objektivu Konvensaun Nasoens Unidas nian kona-bá Alterasaun Klimátika, atu nune’e bele fó garantia hodi kombate diak liu alterasaun iha klima, hodi estebelese kompromisu kuantifikadu ba limitasaun ka redusaun ba emisaun gás hó rezultadu estufa nian, atu halo redusaun global gas hirak ne’e rasik iha 5% tun husi nível ida ne’ebé iha tinan 1990 nian.

Konsellu Ministru ona proposta Rezolusaun. Protokolu Kuioto ne’e sei haruka ba kedas Parlamentu Nasional hodi halo Ratifikasaun ba Adezaun Repúblika Demokrátika Timor-Leste nian.

3.Dokumentu servisu ba Polítika Juventude nian.

Hafoin halo tiha análize, Governu aprova mos dokumentu servisu nian ida ne’ebé iha prinsípiu orientadór atu hodi halo elaborasaun Proposta Lei Baze Juventude nian ida, ne’ebé sei hato’o ba Parlamentu Nasional.

Dokumentu ne’e estebelese área prinsipal ne’ebé sei implementa tuir Lei Baze:

* Mobiliza juventude tuir kontextu komunitáriu;

* Estabelese ligasaun entre Edukasaun no realidade pós-eskolar;

* Oin-sá buka oportunidade diak liu ba empregu;

* Hala’o alfabetizasaun;

* Tulun ema sira ne’ebe mak presiza liu;

* Promove partisipasaun sívika ba juventude.

Konsellu Ministru halo análize tan ba:

4.Proposta kona-bá Lei Baze Desportu nian

Diploma ne’e hakarak atu sai nu’udar proposta ida hosi Governu ba Parlamentu Nasional hodi kria baze dezenvolvimentu prátika nian ba Desportu iha Timor-Leste.

Bainhira remata tiha aprezentasaun ne’ebé hato’o hosi tékniku Sekretaria Estadu Juventude no Desportu, Governu hato’o kedas kuestaun balu no deside atu projektu ne’e sei haré fali hosi Sekretaria Estadu Juventude no Desportu no sei apresia hikas fali iha sorumutu Konsellu Ministru oin mai.