Konsellu Ministrus hala’o sorumutuk iha Palásiu Governu, Dili, no aprova ona projetu Proposta Rezolusaun ba Parlamentu Nasionál ne’ebé aprezenta husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, kona-ba ratifikasaun Protokolu Adezaun ba Organizasaun Mundiál Komérsiu (OMK).

Governu Timor-Leste, liuhusi Vise-Primeiru-Ministru Francisco Kalbuadi Lay, iha loron 26 fulan-fevereiru liubá asina ona protokolu adezaun nian ba OMK ho Diretora-Jerál husi organizasaun ida-ne’e nian, Ngozi Okonjo-Iweala, durante konferénsia ministeriál OMK nian ba da-13, ne’ebé hala’o iha Abu Dhabi, Emiradus Árabes Unidus. Adezaun ba OMK ne’e hanesan pasu krusiál ida hodi promove reformas ekonómikas iha Timor-Leste no marka avansu signifikativu ida iha liberalizasaun komérsiu, insersaun iha ekonomia globál no fasilitasaun hodi asesu ba merkadu internasionál.

****

Konsellu Ministrus aprova projetu Rezolusaun Governu, ne’ebé aprezenta mós husi Vise-Primeiru-Ministru, Francisco Kalbuadi Lay, hodi revoga rezolusaun Governu n. 6/2016, loron 17 fulan-fevereiru, ne’ebé altera husi Rezolusaun n. 24/2023, loron 24 fulan-maiu, ne’ebé kria Komisaun Nasionál ba Fasilitasaun Komérsiu (CONFAC – akrónimu iha portugés).

Desizaun ida-ne’e determina katak funsaun ne’ebé molok ne’e dezempeña husi CONFAC sei absorve husi Unidade Estratéjika ba Integrasaun Ekonómika ne’ebé foin estabelese lalais ne’e. Objetivu prinsipál mak atu garante koordenasaun ida ne’ebé efikás liu kona-ba inisiativa sira fasilitasaun komérsiu nian, inklui reforma lejizlativa, promove diálogu entre parte sira no apoiu ba integrasaun ekonómika país nian. Reorganizasaun iha Gabinete ida-ne’e sai imperativa hafoin Timor- Leste nia adezaun ba OMK, atubele intensifika esforsus koordenasaun no integrasaun ekonomia tuir ezijénsia atuál.