Ministériu Saúde liuhusi apoiu Organizasaun Mundiál Saúde (OMS), promove semináriu tékniku ida ba profisionál saúde sira, durante loron rua, hosi loron 5 to’o 6 fulan-abríl tinan 2024, ho foku iha asu nia tatan no kontrolu ba Raiva (Moras asu bulak). Semináriu ne’e prezide hosi Vise-Ministru ba Fortalesimentu Institusionál Saúde, José dos Reis Magno, akompaña hosi Reprezentante OMS iha Timor-Leste, Arvind Mathur. 

Inisiativa ne’e konta ho partisipasaun hosi médiku espesialista na’in-rua kona-ba virus Raiva hosi OMS, Katrin Bote no Reeta Mani, ne’ebé kolabora iha formasaun ba profisionál saúde sira iha kestaun sira ne’ebé relasiona ho jestaun klínika ba asu nia tatan no prevensaun ba Raiva (Moras asu bulak). 

Realiza mós avaliasaun hamutuk kona-ba riskus husi situasaun Raiva (Moras asu bulak) iha Rejiaun Administrativa Espesiál Oekusi Ambenu (RAEOA), ho intensaun atu avalia riskus da’et nian hosi moras ne’e no fornese rekomendasaun ba parte interesada sira.

Haree ba aumentu hosi asu nia tatan, tau importánsia liuhosi orientasaun imediata ida ba profisionál saúde sira, ho objetivu atu investiga no jere kazu hirak ne’e ho loloos tuir klínika. 

Sekretáriu Estadu Pekuária iha loron 6 fulan-abríl tinan 2024 divulga mós sirkulár ida ho medidas prevensaun no kontrolu ba virus Raiva.